Uyu munsi kuwa 10/05/2022 Ambasaderi w'Igihugu cy'Ubudage mu Rwanda Dr. Thomas Kurz n'intumwa yari ayoboye yasuye Akarere ka Ngororero mu murenge wa Nyange ku kigo cy'amashuli abanza cya Giko. Ni mu rwego rw'ubufatanye (jumelage) hagati y' Intara ya Rhénanie Palatinat n'u Rwanda.

Yakiriwe n'umuyobozi w'Akarere Bwana Nkusi Christophe washimiye umubano mwiza uri hagati y'intara ya Rhénanie Palatinat n'u Rwanda urangwa by'umwihariko no kubaka ibyumba by'amashuli no gutanga ibikoresho mu mashuli.
Aha ku kigo cy'amashuli abanza cya Giko hatanzwe ibitabo mu rwego rwo gushishikariza abana gusoma. Harimo no kubakwa ibyumba 3 by'amashuli.

Mu kiganiro yagiranye n'itangazamakuru Ambassador Dr. Thomas yavuze ko yishimiye umubano mwiza uri hagati y'intara ya Rhénanie Palatinat n'u Rwanda avuga ko azakomeza guharanira kuwuteza imbere.
Mayor Nkusi Christophe yavuze ko uyu mubano ufite uruhare rukomeye mu kuzamura ireme ry'uburezi kuko ibikorwa biwuranga bigabanya ubucucike mu mashuli bikanongerera abanyeshuli ubumenyi.

Ambasaderi Dr. Thomas yakomereje uruzuinduko rwe kw'ishuli ryisumbuye rya Nyange ahasura inzu y'amateka isigasiye amateka y'ubutwari  bwaranze intwari z'Imena z'abanyeshuli b'i Nyange. We n'intumwa yari ayoboye basobanuriwe uburyo aba banyeshuli bakomeye ku bunyarwanda bakanga kwitandukanya bakurikije icyo bitaga amoko icyo gihe nk'uko babisabwaga n'abicanyi ahubwo bagasubiza bati "twese turi abanyarwanda".
Ambasaderi Dr Thomas Kurz yashoje uruzunduko rwe yunamira intwari z'Imenaz'abanyeshuli b'i Nyange anashyira indabyo ku gicumbi cyazo.