Ku bufatanye bwa World Vision TUNGA Cluster na EPR (Eglise Presibterienne au Rwanda) Gaseke mu murenge wa Nyange habaye igiterane cy'imurikabikorwa gifite intego igira iti: "Kuba umunyamwete". Cyitabiriwe  n'Umuyobozi w'Akarere Bwana Nkusi Christophe ari kumwe n'abavugabutumwa ba EPR, AEBR, GOSHEN na ADEPR; abakozi ba World Vision, abagenerwabikorwa n'abakristo benshi.
iki giterane cyaranzwe n'ubuhamya bw'abagenerwabikorwa 1,117 kuri 2,110 ba World Vision na EPR  basabye kuva mu cyiciro cya 1 n'icya 2 babarizwagamo kuko batagikeneye gufashwa.

Abagenerwabikorwa batanze ubuhamya bw'ibyo bamaze kugeraho babikesha World Vision na EPR. Bose biyemeje kuva mu byiciro by'ubudehe barimo bakajya mu byisumbuye bidakeneye ubufasha.
 

Umuyobozi wungirije wa World Vision ku rwego rw'Igihugu yahamagariye abagenerwabikorwa gusigasira ibyagezweho, abashaka kuva mu cyiciro cya 1 n'icya 2 bagakomeza kwiyongera.
Yasabye ko amakimbirane akigaragara mu miryango yahosha kuko niyo soko y'ubukene.

Umuyobozi wa EPR yagarutse kubyo bibandaho ku bufatanye na World Vision bifasha umukristu mw'iterambere rya Roho n'iry'umubiri bityo Roho nzima igatura mu mubiri muzima.
Ibyo bikorwa birimo kugeza ku baturage amazi meza n'amavuriro, amatungo magufi n'amaremare. Mu burezi bafasha amasomero y'abana kandi bakagenera abanyeshuli ibikoresho.

Umuyobozi w'Akarere Bwana Nkusi Christophe yashimiye ubuyobozi bwiza bw'Igihugu cyacu buhora buzirikana ku mibereho myiza y'abaturage hashakwa abafatanyabikorwa nka World Vision. Yashimiye abaturage bazamutse mu ntera bakava mu byiciro by'abafashwa.
Mayor Nkusi yagarutse ku mirire mibi iteye ipfunwe n'amakimbirane amunga iterambere. Yasabye abaturage kurushaho kwitabira umurimo, kwizigamira muri Ejo Heza, gusigasira ibyagezweho kugira ngo bikomeze kugirira  benshi akamaro.