Mu kwishakamo ibisubizo aborozi bo mu nzuri za Gishwati bibumbiye muri Koperative y'Aborozi bo mu murenge wa Muhanda (KAMU) bari gukora umuhanda w'ibirometero 8. Ni umuhanda Gapfunsi-Bweru usafasha kuvana umusaruro w'amata kw'ikusanyarizo rya Bweru riri mu nzuri za Gishwati rwagati ukunyura ku murenge wa Muhanda werekeza kw'ikaragiro rya Mukamira.

Nk'uko veterineri w'umurenge wa Muhanda Bwana Gasana Evariste abivuga, ngo kuva imvura iherutse yagwa umusarurow'amata uva i Bweru utwarwa ku magare mu majerekani ukerekezwa ku ikusanyirizo rya Muhumyo riherereye mu kagari ka Bugarura hafi y'ibiro by'umurenge.

Umuyobozi w'Akarere wungirije ushinzwe iterambere ry'ubukungu Bwana Uwihoreye Patrick ari kumwe n'umunyamabanga nshingwabikorwa w'Akarere Bwana Abiyingoma Gerard basuye aba bari kubaka umuhanda basanga imirimo igenda neza, hakenewe ibiti byo gukora ibiraro.

 Nk'uko veterineri abivuga, uretse ikibazo cy'uyu muhanda utuma umusaruro w'amata utagemurwa neza, abarozi banafite imbogamizi zo kutagira ibicuba ku buryo hari amata atwarwa mu majerekani.

Ngo hari kandi amakusanyirizo akenewe kuvugururwa by'umwihariko irya Bweru ritagira amazi n'amashanyarazi. Mu gukonjesha amata hifashishwa moteri naho ikigega cyabikaga amazi y'imvura ngo cyarangirijwe n'abashumba.

 Mu nzuri za Gishwati

Umushinga ugamije guteza imbere ubworozi bw’inka zitanga umukamo mu Rwanda (RDDP= Rwanda Dairy Development Project) ugiye gutangira gukorera mu Karere ka Ngororero ushobora kuzoroshya ibi bibazo. Uvuga ko:

- uzatera inkunga imishinga igamije gutunganya amata, kuyongerera agaciro no kuyacuruza (abantu ku giti cyabo cyangwa amakoperative) ,

- uzubaka ubushobozi bwa koperative zicunga amakusanyirizo y’amata;

- uzategura amahugurwa y’aborozi n’abashumba binyuze mu mashuri y’aborozi (Livestock Farmer Field Schools: L-FFS),

- uzakora ubukangurambaga mu gushishikariza abaturarwanda ibyiza byo kunywa amata (milk consumption awareness campaign),

- uzakorana by’umwihariko n’aborozi bo mu nzuri za Gishwati

Koperative KAMU izakorana n'uyu mushinga ifite abanyamuryango bagera kuri 300, bororera mu nzuri 322 ziri ku buso bwa hegitari 1610.