Mu mirenge yose Intore z' Inkomezabigwi icyiciro cya 13 bashoje ibikorwa by'urugerero rudaciye ingando bakoreye mu tugari mu gihe cy'iminsi 30. Guverineri w'Intara y'Iburengerazuba Hon Ntibitura Jean Bosco ari kumwe na bamwe mu bayobozi b'Inzego z'Umutekano ku rwego rw'Intara  bitabiriye iki gikorwa cyabereye mu murenge wa Kabaya ku rwego rw'Akarere.
Mu guha ikaze abashyitsi Umuyobozi w'Akarere Bwana NKUSI Christophe yagarutse ku ijambo rya Nyakubahwa Perezida wa Repubulika Paul Kagame rigira riti:
"Urugerero ni ifumbire y'ubwonko. Utarugiyemo aragwingira". Aha yashimiye  Inkomezabigwi 
1032  zitabiriye urugerero kuri 1122 bari bategerejwe. Mu karere ka Ngororero bitabiriye ku kigero cya 92%.
Bakoze imirimo myinshi irimo kubaka inzu n'ubwiherero by'abatishoboye, kurwanya imirire mibi n'igwingira,  kubaka imirima y'ibikoni, guhanga imihanda, kurwanya isuri, kubaka ingarani, gusiza ibibanza, ....

Mayor Nkusi:" ibi bikorwa biragaragaza intambwe urubyiruko bamaze gutera mu gukunda igihugu no kugikorera batizigamye."
Yashimiye Hon. Guverineri wahisemo kwifatanya n'Akarere ka Ngororero mu gusoza ibikorwa by'Itorero ry'Inkomezabigwi icyiciro cya 13.
Umuyobozi w'Inkeragutabara mu Ntara y'Iburengerazuba Brigadier General Albert Rugambwa aganiriza Inkomezabigwi  yagize  ati: "Gukunda u Rwanda no kurwimana ubuziraherezo bishinge imizi mu rubyiruko. Mwamaganire kure ingengabitekerezo ya Jenoside n'ibiyishamikiyeho byose."
Guverineri w'Intara y'Iburengerazuba Hon. Ntibitura Jean Bosco  ashimira Inkomezabigwi  ibikorwa  bakoze yagarutse ku nsanganyamatsiko  yaranze Urugerero yagiraga iti: "Duhamye umuco w'ubutore twimakaza ubumwe n'ubudaheranwa bw'Abanyarwanda". Aha yashimiye urubyiruko ubwitange bagaragaje mu guhashya bimwe mu bibazo bikibangamiye imibereho myiza y'abaturage. Yabasabye gukomera ku ndangagaciro nyarwanda bagakomeza kuba umusemburo wa Ndumunyarwanda bakarangwa n'ishyaka ryo kwigira no kwihesha agaciro.
Yabibukije ko ikinyarwanda ari ururimi ruduhuza abasaba guharanira kukivuga no ku cyandika neza. Ibirori byashojwe  no kugaburira abana indyo yuzuye mu rwego rwo kurwanya imirire mibi n'igwingira. Hanasuwe inyubako y'igikoni cya GS Rususa mu murenge wa Ngororero  kizahahagarira Intara y'Iburengerazuba   mu bikorwa by'indashyikirwa by' Inkomezabigwi icyiciro cya 13 ku rwego rw'Igihugu.