Kuri uyu wa 15/06/2025 k'Uruganda rw'icyayi rwa Rubaya Mountain Tea hashojwe igikorwa cyo kwibuka ku nshuro ya 31 abari abakozi b'uru ruganda bishwe muri Jenoside yakorewe Abatutsi mu 1994
Igikorwa cyitabiriwe n'Umunyamabanga Nshingwabikorwa w'Intara y'Iburengerazuba Madame UWAMBAJEMARIYA Florence wari umushyitsi mukuru, Intumwa y'Umuryango IBUKA ku rwego rw'igihugu Hon. Annoncée MANIRARORA,
Umuyobozi w'Akarere @cnkusi20, Umuyobozi w'Akarere wungirije ushinzwe iterambere ry'imibereho myiza y'abaturage Madame Mukunduhirwe Benjamine, abayobozi b'inzego z'umutekano zikorera mu Karere, abakozi b'uruganda burangajwe imbere n'Umuyobozi Mukuru warwo Bwana, abakozi ba koperative zihinga icyayi zibumbiye muri COTRAGAGI, abakozi n'abaturage b'umurenge wa Muhanda uruganda ruherereyemo.
Ibiganiro n'ubuhamya bwatanzwe byose byerekezaga ku gushimira ingabo zahagaritse Jenoside zikarokora abahigwaga barokotse Jenoside yakorewe Abatutsi mu 1994; ubuyobozi bwiza bw'Igihugu cyacu burangajwe imbere na Nyakubahwa Perezida wa Repubulika Paul Kagame buhora buzirikana iterambere ry'imibereho myiza y'abaturage nta numwe uhejwe.
Umunyamabanga Nshingwabikorwa w'Intara y'Iburengerazuba Madame UWAMBAJEMARIYA Florence yihanganishije abarokotse abashimira ko banze guheranwa n'agahinda bakaba bakomeye mu iterambere ryabo bwite n'iry'Igihugu muri rusange.
Yaboneyeho kwibutsa abantu bose kugendera kure ingengabitekerezo ya Jenoside  no kwamaganira kure abagishaka kubiba amacakubiri mu banyarwanda.
Iki gikorwa cyaranzwe kandi no kunamira inzirakarengane ziciwe muri uru ruganda  hashyirwa indabo kuri monument igaragaza amateka mabi yahabereye.
Igikorwa cyashojwe no kuremera
imiryango 5 y'abarokotse Jenoside yakorewe Abatutsi mu 1994.