Mu Karere ka Ngororero mu murenge wa Kavumu habereye igikorwa cyo kwibuka ku nshuro ya 31 Jenoside yakorewe Abatutsi mu 1994.
Igikorwa cyabanjirijwe n'urugendo rwo kwibuka ruva kuri centre ya Bereshi rwerekeza ku rwibutso rwa Jenoside yakorewe Abatutsi rwa Kavumu; aharuhukiye inzirakarengane 374.
Mu murenge wa Kavumu Jenoside yakorewe Abatutsi yaranzwe n'ubukana budasanzwe aho abana 12 bajugunywe mu rwobo ari bazima.
Igikorwa cyitabiriwe na Komite Nyobozi y'Akarere, intumwa ya IBUKA ku rwego rw'Igihugu, delegation yaturutse mu Karere ka Musanze, bamwe mu bajyanama mu Nama Njyanama y'Akarere, abayobozi b'Inzego z'Umutekano zikorera mu Karere, abayobozi n'abaturage b'umurenge wa Kavumu n'iyo bihana imbibi.
Umunsi waranzwe n'ikiganiro cyo kwibuka ku nshuro ya 31 Jenoside yakorewe Abatutsi cyatanzwe n'Umujyanama Shyerezo Norbert, ubuhamya bwa Uwiragiye Sylivie warokotse Jenoside yakorewe Abatutsi, ubutumwa bw'Umuryango bwa IBUKA bwatanzwe na Hon. Manirarora Annoncée, ijambo ry'umushyitsi mukuru Mayor Nkusi Christophe,  gushyira indabo ku rwibutso no kuremera warokotse Jenoside yakorewe Abatutsi.
Uwiragiye Sylvia yavuze ubuzima bubi yabayemo igihe bahigwaga, uburyo abana bavukana bose bishwe bakaba bashyinguye mu rwibutso rwa Kavumu.
Yashimiye ingabo zahagaritse Jenoside akaba yarabashije kurokoka. Yanashimiye ubuyobozi bwiza bw'Igihugu cyacu burangajwe imbere na Nyakubahwa Perezida wa Repubulika Paul Kagame bwatumye abarokotse Jenoside yakorewe Abatutsi basubira mu buzima busanzwe ubu bakaba batanga umusanzu ukomeye bubaka igihugu ari nako baharanira kwiteza imbere. Ati "turakomeye n'ubwo tugifite ibikomere ntibitubuza gutwaza gitwari."
Intumwa y'umuryango IBUKA Hon. Manirarora Annoncée yagizeati "kwibuka ni ugusubiza abacu agaciro bambuwe igihe bicwaga urw'agashinyaguro. Ni iburyo bwo kwamagana ingengabitekerezo ya Jenoside n'abagihembera amacakubiri mu banyarwanda. "
Yagarutse k'umwihariko wa Jenoside yakorewe Abatutsi mu Karere ka Ngororero kuko kabereyemo igeragezwa rya Jenoside mu 1993.
Nawe yashimiye abagize uruhare rwaba urwa hafi rwaba urwa kure mu kurokora abahigwaga agira ati "Inkotanyi ni ubuzima." Yihanganishije abarokotse agira ari mukomere mutwaze urumuri rw'Icyizere nturuzigere ruzima.
Umuyobozi w'Akarere Bwana Nkusi Christophe yihanganishije abarokotse abashimira ko bataheranywe n'agahinda bakaba bageze kure baharanira iterambere.
Yashimiye imbaga y'abitabiriye iki gikorwa uburyo baje gufata mu mugongo abarokotse  no kunamira inzirakarengane zishwe muri Jenoside yakorewe Abatutsi mu 1994. Abasaba guca ukubiri n’ingengabitekerezo ya Jenoside no kwamaganira kure abagishaka kuyibiba mu banyarwanda.
Igikorwa cyashojwe no kunamira inzirakarengane zishyinguwe mu rwibutso rwa Kavumu hashyirwaho indabo.
Itorero ADEPR KAVUMU ryaremeye inka umudamu warokotse Jenoside yakorewe Abatutsi.
#TwibukeTwiyubaka#.