Kwibuka ku nshuro ya 31 Jenoside yakorewe Abatutsi mu 1994 mu Karere ka Ngororero byakomereje ku rwibutso rwa Jenoside yakorewe Abatutsi rwa Nyange ruherereye mu Murenge wa Nyange. 

Uru rwibutso ruruhukiyemo inzirakarengane barenga 7000.
Mu guha ikaze abashyitsi Umuyobozi w'Akarere Bwana NKUSI Christophe yagarutse ku bukana bwa Jenoside yakorewe Abatutsi mu 1994 mu Karere ka Ngororero.

Yagize ati:
- kuba hari inzibutso 7 bigaragaza imbaga y'abatutsi biciwe muri aka Karere
- kuba uwari Padiri mukuru wa paroisse ya Nyange yarategetse ko kateripirali iriturira kiliziya ku batutsi bari bayihungiyemo ni ubugome bw'indengakamere
- kuba Jenoside yarageragerejwe mu cyahoze ari komini Kibilira mu 1990 byerekana ko abatutsi bishwe urusorongo kuva kera
-  imbwirwaruhame y'umunyapolitiki Leon Mugesera yahamagariye abaturage kwica Abatutsi ngo babanyuze iy'ubusamo (Nyabarongo) ngo basubire iwabo muri Etiyopiya byatije umurindi iyicwa ry'Abatutsi hapfa abatagira ingano....
 

Hon. Senateri Prof. Dusingizemungu Jean Pierre yatanze ikiganiro ku mateka ya Jenoside yakorewe Abatutsi.
Yasabye ko ubutabera mpuzamahanga bwakurikirana igihugu cy'Ububiligi gikomeje kubiba amacakubiri mu karere u Rwanda ruherereyemo aho abatutsi bakomeje kwicwa  bazira uko baremwe.

Muhawenimana Blandine yarokotse Jenoside yakorewe Abatutsi mu 1994.
Yashimiye ubuyobozi bwiza bw'Igihugu cyacu budahwema kuzirikana ku mibereho myiza y'Abarokotse ahamya ko ubu bageze aheza biyubaka.

Perezida wa IBUKA Ntagisanimana Jean Claude yagarutse ku bibazo bikibangamiye abarokotse:
- abishwe muri Jenoside bataraboneka ngo bashyingurwe mu cyubahiro
- amacumbi y'Abarokotse ashaje
- ingengabitekerezo ya Jenoside ikigaragara mu Karere
- inzibutso zitaratunganywa bijyanye n'igihe
- imanza za gacaca zitararangizwa
Yasabye ubuvugizi ngo izi mbogamizi zive mu nzira.

Hon. Senateri Niyomugabo Cyprien  yari umushyitsi Mukuru muri iki gikorwa.
Yagarutse kuri politiki y'amacakubiri yabibwe ku mugaragaro kuri Leta ya mbere n'iya kabiri,  disikuru z'abayobozi bakuru byose byaganishaga kuri Jenoside yakorewe Abatutsi mu 1994.
Yasabye buri wese kwimakaza politiki y'Ubumwe n'Ubudaheranwa bw'Abanyarwanda, kwamagana ingengabitekerezo ya Jenoside, kunyomoza abakigambiriye kugoreka amateka ya Jenoside yakorewe Abatutsi mu 1994.
Yasabye urubyiruko rwo Rwanda rw'ejo kubigiramo uruhare rufatika.
Umunsi wasojwe mo gushyingura mu cyubahiro imibiri 2 yabonetse no kunamira inzirakarengane ziruhukiye mu rwibutso rwa Jenoside yakorewe Abatutsi rwa Nyange hashyirwa indabo kuri uru rwibutso.

Iki gikorwa cyitabiriwe n'Abasenateri, Abadepite, Intumwa z'Akarere ka Karongi, abayobozi b'Inzego z'Umutekano ku rwego rw'Intara n'Akarere, Umunyamabanga Nshingwabikorwa w'Intara, Mufti w'u Rwanda, itsinda ryaturutse muri MINUBUMWE, abayobozi b'amadini n'amatorero, abafite ababo n'inshuti bashyinguye muri uru rwIbutso baturutse imihanda yose, Umuyobozi w'Inama Njyanama y’Akarere, abajyanama mu Nama Njyanama y'Akarere, Perezida wa IBUKA mu Karere, Perezida wa AVEGA mu Karere, abayobozi n'ibigo bitandukanye bikorera mu Karere, abayobozi n'abaturage b'Umurenge wa Nyange n'iyo bihanye imbibi.