Kuri uyu wa mbere tariki 14/10/2024 inama y'Ihuriro ry'Ubumwe n'Ubudaheranwa ku rwego rw'Akarere yateranye ku nsanganyamatsiko igira iti: "Indangagaciro na kirazira, isoko y'Ubumwe n'Ubudaheranwa bw'Abanyarwanda." 
Yitabiriwe na Minisitiri w'Umutekano mu Gihugu akaba n'imboni ya Guverinoma mu Karere ka Ngororero Hon. Visenti Biruta
Afungura inama yashimiye Nyakubahwa Perezida wa Repubulika Paul KAGAME "dukesha intambwe ikomeye y'Ubumwe n'Ubudaheranwa bw'Abanyarwanda." 
Minisitiri Biruta yavuze ku ntambwe ikomeye yatewe muri uru rwego aho mu mwaka wa 2022  igipimo cy'ubumwe n'ubwiyunge cyari kigeze kuri 94,2%. 
Yagarutse ku nzitizi zikibangamiye inzira y'Ubumwe n'Ubwiyunge zirimo
abacyibona mu ndorerwamo y'amoko, abagifite ingengabitekerezo ya jenoside, abahakana n'abapfobya Jenoside yakorewe Abatutsi mu 1994,...

Yagize ati uyu ni umwanya wo gusasa inzobe tukarebera hamwe inzitizi zikiriho tukazivana mu nzira bityo tukubaka u Rwanda twifuza.
Hatanzwe ikiganiro ku mavu n'amavuko y'Ihuriro ry'ubumwe n'ubudaheranwa mu Rwanda, hakurikiraho kungurana ibitekerezo ku nsanganyamatsiko nyuma habaho ibiganiro mu matsinda.

Nyuma y'ibiganiro mu matsinda hafashwe imyanzuro ikurikira:
-Kwinjiza gahunda ya Ndumunyarwanda mu mashuli
-Gusesengura ibibazo by'abarokotse Jenoside yakorewe Abatutsi bikabonerwa ibisubizo.
-Gutanga amakuru ku mibiri y'abazize Jenoside yakorewe Abatutsi mu 1994 itaraboneka igashyingurwa mu cyubahiro
-Kumanura gahunda y'ubumwe n'ubudaheranwa mu nzego zose ikagera kuri bose
-Gushyira imbaraga mu kwigisha ibyiciro byihariye harimo abagororwa bagize uruhare muri Jenoside yakorewe abatutsi batarirega ngo bemere icyaha
-Gushyira imbaraga mu kurangiza imanza gacaca.
Asoza inama Minisitiri Biruta yagize ati "Uwabaye umuyobozi  ahora mu nshingano tugomba guhozaho tukabonera ibisubizo ibibazo bitwugarije. Nta bandi bazabikora mu mwanya wacu nitwe tugomba gufata iya mbere mu kubikemura.

Inama yahuje abari abayobozi mu nzego zitandukanye nyuma ya Jenoside yakorewe Abatutsi mu 1994, bamwe mu bagize Unit Club Intwararumuri,  Komite Nyobozi y'Akarere, abayobozi b'inzego z'umutekano, abajyanama mu Nama Njyanama y'Akarere, abanyamabanga nshingwabikorwa b'imirenge. 

Ku gicamunsi Hon.Visenti Biruta n'itsinda ayoboye  bakurukiranye aho Akarere kageze kesa imihigo. 
Umuyobozi w'Akarere Bwana Nkusi Christophe yerekanye ibyagezweho, ibigamijwe, imbogamizi n'uburyo bwo kuzikemura.
 Mu byagezweho hazamutse umusaruro w'ubuhinzi n'ubworozi,  igwingira ry'abana ryaragabanutse riva kuri 50. 5% kugeza kuri 24, 7%, ubwisungane mu kwivuza bwarazamutse buva kuri 91,5% (2022/2023)  bugera kuri 98,5% (2023/2024); uyu mwaka  2024/2025 Akarere kari kuri 93% bigashyira ku mwanya wa 4 ku rwego rw'Igihugu.

 Muri rusange  ibipimo byarazamutse no muri gahunda ya Ejo Heza, imitsindire mu mashuli (ubu igeze kuri 97,5%),  kurwanya isuri, ubukerarugendo (bubangamiwe n'imihanda yangijwe n'ibiza), imyidagaduro, kubaka amasoko ya kijyambere, ubuhahirane, ibikorwa remezo by'amazi n'amashanyarazi, amashuli (ubucucike bwaragabanutse, ingendo zakorwaga abana bajya/bava ku ishuli zaragabanutse).
Akarere gafite imihigo  126 muri yo 77 imaze kweswa ku gipimo cy'100% mu gihembwe cya mbere cy'umwaka wa 2024-2025. 
Minisitiri Biruta yashimiye ubuyobozi bw'Akarere aho kageze mu iterambere,  asaba ko abana bose bataye ishuli barigarukamo, yizeza ubufatanye busesuye n'Akarere mu iterambere ryako.

IHURIRO RY'UBUMWE N'UBUDAHERANWA BW'ABANYARWANDA MU MAFOTO