Abaturage bagera ku 142,346 b'imirenge 6 Ngororero, Kavumu, Muhanda, Kabaya, Sovu na Kageyo bagiye kubona amazi  meza 100%. Bazayahabwa n'ikigo  gishinzwe gukwirakwiza amazi meza, isuku n'isukura mu Gihugu WASAC Ltd ku mafaranga asaga rwfrs 7,500,000,000  azava muri Banki Nyafurika  Itsura Amajyambere AfBD. Ni imiyiboro 3 izaba ifite uburebure bwa km 168,390, ibigega 41 n'amavomo 112. Nta muturage uzavoma muri metero zirenze 500.

Iyo miyoboro 3 ni:

- Muhembe izagaburira imirenge ya Ngororero, Kageyo n'igice cy'umurenge wa Muhanda n'igice cy'umurenge wa Kavumu;

- Nyamyotsi izaha amazi umirenge wa Kabaya n'igice gisigaye cy'umurenge wa Muhanda;

- Nyirarongero izageza amazi meza ku baturage b'umurenge wa Sovu n'igice gisigaye cy'umurenge wa Kavumu.

Biteganijwe ko ahagana mu mwaka wa 2035 umuyoboro wa Muhembe uzaba uvomwa n'abaturage  91,439 amazi angana na m³ 3,676 ku munsi; Nyamyotsi izavomwa n'abaturage 28,371 amazi anagana na m³  783 ku munsi naho Nyirarongero ikazavomwa n'abaturage 22,536 bazakoresha m³ 613 ku munsi.

Uyu mushinga ukazarangira  nibura 92% by'abatuye Akarere ka Ngororero bafite amazi meza kandi hafi yabo. Magingo aya abaturage bafite amazi meza ni  80%.

Akarere ka Ngororero ni kamwe mu turere abaturage babona amazi hatiyambajwe za pompes zikoreshwa n'amashanyarazi cyangwa inganda zo kuyatunganya (water plants) kubera imiterere yako. Ni Akarere k'imisozi miremire bituma amazi amanuka cyangwa akazamuka mu matiyo nta zindi ngufu bisabye.

Uyu mushinga uzatuma abagenerwabikorwa bawo babona akazi kandi abazangirizwa ibikorwa bazahabwa ingurane.

Imwe mu mpungenge zagaragajwe ni uko hari abaturage bashyira ibikorwa ahazaca imiyoboro ngo bakunde bazishyurwe. Aha intumwa za Wasac zasabye ubuyobozi bw'Akarere kubaba hafi bagahagarika bene ibyo bikorwa ababikora  bagakorerwa ubukangurambaga ko aribo bagenerwabikorwa bityo ko bakwiye korohereza ababubakira ibikorwa remezo.

Indi mbogamizi ni ijyanye n'ibyangombwa bisabwa kugirango unuturage abone ingurane bitinda kuboneka. Nanone ubuyobozi bw'Akarere bwasabwe kuba hafi  bakabibona vuba bakanabitanga ku gihe. Umuyobozi  w'Akarere Bwana Nkusi Christophe yijeje ubufatanye bwimbitse kugirango umushinga uzagere ku ntego nta nkomyi. Ibikorwa biratangira mu mezi 2 ari imbere bikazamara amezi 18.