Inteko  rusange y'Inama y'Igihugu y'Abagore yateranye iyobowe n'Umuhuzabikorwa  wayo ku rwego rw'Akarere  Madamu Mukeshimana Marie Claire ku nsanganyamatsiko igira iti: "Uruhare rw'umugore mu kubaka umuryango ushoboye kandi utekanye."
Iyi nteko yitabiriwe n'Umuyobozi w'Akarere Bwana Nkusi Christophe ari kumwe n'abayobozi b'inzego z'umutekano, bamwe mu bajyanama mu Nama Njyanama y'Akarere, Abanyamabanga Nshingwabikorwa b'Imirenge. 
Abitabiriye iyi nteko bahawe ibiganiro bitandukanye byibutsaga abagore uruhare rwabo  mu iterambere ry'igihugu n'ubusugire bw'ingo.
Muri iyi nteko kandi habayeho gushyira ahagaragara imihigo ya ba Mutimawurugo muri uyu mwaka w'ingengo y'imari wa 2025-2026 no kuyisinya hagati n'umuhuzabikorwa w'inama y'Igihugu y'Abagore n'Umuyobozi w'Akarere no hagati y'abahuzabikorwa ba CNF mu mirenge n'Abanyamabanga Nshingwabikorwa bayo uko ari 13.

Umuyobozi w'Akarere yashimiye Ubuyobozi bwiza bw'Igihugu cyacu burangajwe imbere na Nyakubahwa Perezida wa Repubulika Paul Kagame bwahaye umugore agaciro akwiriye mu muryango nyarwanda. Aha yasabye abagore kuzesa imihigo biyemeje kuzashyira mu bikorwa.

Mayor Nkusi: "Iyi mihigo muyigire iyanyu, muyizirikane, muyumve, muyihozeho ijisho, muyishyire mu bikorwa. Imihigo ni nk'umurwayi w'indembe ni ukuyihozaho ijisho.
Birasaba uruhare rwa buri wese mu kuyishyira mu bikorwa. Dutahirize umugozi umwe twubake umuryango ushoboye, ushobotse, kandi utekanye kiko ubumwe bwacu nizo mbaraga zacu."
Yasabye abagore kurwanya amakimbirane mu miryango kuko kutuzuzanya hagati y'abayigize ari imwe mu  nzitizi
z'iterambere kuko bikurura imirire mibi n'igwingira, guta ishuli kw'abana, ubuzererezi, gutagira indangagaciro nyarwanda na kirazira bikigaragara mu bakiri bato.
Mayor Nkusi yahamagariye abitabiriye inama gushyira imbaraga muri gahunda za Leta zirimo itangira ry'amashuli n'igihembwe cy'ihinga 2026A biri hafi.