Umuyobozi w'akarere ka Ngororero, Bwana NKUSI Christophe ari kum+we n'umuyobozi w'Akarere   wungirije ushinzwe iterambere ry'ubukungu Bwana UWIHOREYE Patrick yayoboye  inama yateguwe n'umufatanyabikorwa World Vision Rwanda/ Tunga Cluster yo gutegura igenamigambi ry'umwaka wa 2026 hamwe n'abafatanyabikorwa bayo.
Umuyobozi wa Porogaramu  Tunga Cluster Bwana Aaron Rukema NTEZIRYAYO yeretse abitabiriye inama ibyakozwe muri 2024 ndetse n’ibiteganijwe mu myaka itatu iri imbere kuva 2026 kugeza 2028.
Umuyobozi w'akarere ka Ngororero yashimye ibyagezweho na World Vision anashimira abafatanyabikorwa bitabiriye iyi nama uruhare bagize mu migendekere myiza y'ibikorwa bya World Vision anabizeza ubufatanye mu bikorwa biteganijwe mu myaka itatu iri imbere. 

World Vision/Tunga Cluster irateganya gukomeza ibikorwa mu burezi, isuku n’isukura, kurwanya imirire mibi n'igwingira, iterambere ry’ubukungu, guhangana n'ingaruka ziterwa n'imihindagurikire y’ikirere, kubaka Umuryango ushoboye kandi utekanye no kurengera abana hagamijwe kuzamura imibereho yabo n'ababyeyi.
Abitabiriye inama bagabanijwe mu matsinda atandukanye hagamijwe guhitamo ibikorwa bizakorwa mu myaka itatu iri imbere. Byashyizwe  mu nkingi eshatu (ubukungu, imibereho myiza n'imiyoborere myiza).
Inama yitabiriwe kandi n'abatekinisiye b'Akarere, inzego z’umutekano, abayobozi b’imirenge n’abakozi bayo, abayobozi b'ibigo by'amashuli,  abayobozi b'amadini n'amatorero, abayobozi b’ibitaro n'ab'ibigo nderabuzima.