Umuvunyi mukuru wungirije Madame Yankurije Odette n'itsinda ayoboye bashoje uruzinduko rw'akazi rw'iminsi 5 bagiriraga mu Karere ka Ngororero.
Uruzinduko rushojwe no kugaragaza imbonerahamwe y'ibibazo bagejejweho n'abaturage ubwo babasangaga iwabo mu mirenge mu rwego rwo kubashishikariza kurwanya ruswa n'akarengane.
Umuvunyi mukuru wungirije Yankurije:"Iyo ikibazo cyabonetse biba ari intambwe ya mbere yo kugikemura...Iyo umuturage yagejeje ikibazo cye ku rwego rw'umuvunyi ntikiba kikiri icye kiba cyabaye icy'umuvunyi bivuga ko uru rwego rugomba kugishakira igisubizo"
Yavuze ku byiciro by'ibibazo 298 bagejejweho n'abaturage: Icyiciro cya mbere kigizwe n'ibibazo 117 byari byarahawe umurongo ariko abaturage bakagaragaza ko batanyuzwe cyangwa bakabigarukaho nkana.
Icya 2 kigizwe n'ibibazo 171 bitarabonerwa ibisubizo;
Icya 3 kirimo ibibazo10 bizakurikiranwa n'urwego rw'umuvunyi.

Urwego rw'umuvunyi rwasanze ibibazo byinshi bishingiye ku makimbirane n'ubuharike (ibi bikaba  inkomoko y'ibindi bibazo nyinshi bishamikiyeho nk' imirire mibi n'igwingira, guta ishuli kw'abana, isuku nkeya, ubukene,...);
gusaba ubufasha ku bijyanye n'imibereho myiza, imanza zitarangijwe (hari imirenge yamaze igihe idafite abanyamabanga nshingwabikorwa).
Hari kandi ibibazo binini: abaturage bafite ubutaka bubaruye kuri Leta n'ibijyanye n'ingurane. Hanzuwe ko ibibazo byose bigomba kubonerwa ibisubizo by'umwihariko ibihuriweho n'inzego zitandukanye bityo umuturage akabaho mu mudendezo.
Umuvunyi mukuru yashimiye uburyo abaturage bitabiriye ari benshi kandi bakagaragaza ishyaka ryo kwamaganira kure ruswa n'akarengane.

Igikorwa cyitabiriwe n'umuyobozi w'Akarere Bwana Nkusi Christophe wari kumwe na visi perezida w'Inama Njyanama y'Akarere, inzego z'umutekano n'abanyamabanga nshingwabikorwa b'imirenge