Urwego rw'Igihugu rw'ubugenzacyaha RIB rwakoze ubukangurambaga mu mashuli yisumbuye bugamije gukumira ibyaha ku nsanganyamatsiko: "Uruhare rwanjye mu kurwanya ibyaha byo gusambanya abana, ibiyobyabwenge n'ibindi byaha byibasiye urubyiruko"

Ubu bukangurambaga bwabereye mu murenge wa Matyazo mu ishuli ry'abakobwa College de l'Immaculee Conception Muramba. Hari kandi abanyeshuli bo mubigo bituranyi nka TTC Muramba, TVET St Charles Lwanga na GS Muramba B.

Umwe mu bakozi ba RIB Ntirenganya Jean Claude yatanze ikiganiro kirambuye ku
byaha n'ibihano, inzego zitabazwa mu gihe habonetse icyaha. Yagize ati RIB irashishikariza urubyiruko kugendra kure ababashora mu byaha by' umwihariko ubusambanyi no kunywa ibiyobyavwenge, abasaba kurangwa n'indangagaciro nyarwanda,kudahishira abanyabyaha no gukumira ibyaha bitaraba. Yasabye ko mu mihigo y'uturere hakwinjizwamo umuhigo wo kurwanta ibyaha kandi ukiitabwaho.

Ubutangabuhamya bw'uwari imbata y'ibiyobyabwenge akaza kubireka n'ubuhamya bw'uwacurujwe mu gihugu cyo muri Aziya bwakanguye urubyiruko ku buryo bugaragara.

Umuyobozi w'Akarere Bwana Nkusi Christophe yasabye urubyiruko ko ubukangurambaga bahawe butaba amasigara cyicaro. Yashimiye ubuyobozi bwiza bw'Igihugu cyacu buhora buzirikana urubyiruko rwo mbaraga z'igihugu kandi Rwanda rw'ejo.

Umunyamabanga nshingwabikorwa w'Intara y'Iburengerazuba Madame Uwambajemariya Florence yagize ati dukeneye u Rwanda rw'ejo ruzira amakemwa. Ati ibyo ntitwabigeraho tutitaye ku rubyiruko. Yashimiye RIB umurimo ukomeye ikora ayizeza ubufatanye bw'Intara y'Iburengerazuba.

.
Umushyitsi mukuru yari umunyambanga mukuru wungirije wa RIB Madame Kalihangabo Isabelle. Yashimiye abayobozi n'abanyeshuli uburyo bakurikiye ibiganiro byatanzwe abashishikariza kwita ku mpanuro bahawe anabasaba kuzisakaza hose. Yabasabye gukunda Igihugu no kukirinda ababa bagambiriye gushora urubyiruko mu byaha bitandukanye. Urubyiruko rw'abanyeshuli rwahawe umwanya wo kubaza ibibazo abayobozi no gutanga ibitekerezo. Nabo bavuze k'ububi bw'ibyaha banarahirira guca ukubiri babyo no gusakaza impanuro bahawe.

Ubukangurambaga bwashojwe no guhemba abanyeshuli bashubize neza ibibazo kurusha abandi.