Kuri uyu wa kane tariki ya 15 Nyakanga 2020 urubyiruko rw'abakorerabushake rwagiranye inama n'umuyobozi w'Akarere Bwana Ndayambaje Godefroid ari kumwe n'umuyobozi wa Police n'uwa Dasso ku rwego rw'akarere.

Umuyobozi w'Akarere atangiza inama yashimiye urubyiruko rw'abakorerabushake rwagaragaje ibikorwa by'indashyikirwa mu kurwanya icyorezo cya Coronavirus mu mirenge batuyemo batitaye ku ngendo ndende bakora.

Mayor  NDAYAMBAJE  yagize ati "ntimusiba gukora ubukangurambaga haba mu masoko, mu ma centres y'ubucuruzi,  mu mihanda n'ahandi hahurira abantu benshi."

Umuyobozi wa Police mu Karere ka Ngororero nawe yagarutse ku mikorere n'imikoranire y'inzego z'ubuyobozi, iz'umutekano n'urubyiruko rw'abakorerabushake avuga ko impande zose batahiriza umugozi umwe mu gukumira no kwirinda Coronavirus.
Yabasabye gukurikirana byimbitse iyubahirizwa ry'amabwiriza yo kwirinda COVID-19 ahantu hose.

Umuyobozi w'Akarere yabibukije kwibanda ku dusoko turema nimugoroba kuko usangamo abaturage barangariye guhaha bakibagirwa kwita ku mabwiriza bagomba kubahiriza.
Yanabasabye kugaragaza imbogamizi bahura nazo mu bukorerabushake bwa buri munsi kugirango zishakirwe ibisubizo barusheho gutanga umusaruro.

Abahagarariye Youth Volunteers mu mirenge bahurije ku mbogamizi z'uko haboneka abaturage batubahiriza amabwiriza ndetse ngo hari n'igihe basuzugura ababagira inama yo kwirinda. Urubyiruko kandi ngo bakeneye icyafasha kwica isali kugirango bakore kuva mu gitondo kugera nimugoroba.

Umuhuzabikorwa w'urubyiruko mu murenge wa Bwira Hakuzimana  Jean Baptiste yavuze ko hakiri abaturage bagaragaza ubushake buke bwo kwambara agapfukamunwa. Yatanze urugero ku barema isoko rinini rya Gashubi birengagiza nkana  kukambara, bagirwa inama bagatera amahane.
Iradukunda Bijou ukorera mu murenge wa Kabaya yavuze ko no mu mijyi nka Kabaya usanga abantu bajijutse batita ku mabwiriza yo kwirinda COVID-19.
Iradukunda Modeste Coordinator wa Youth Volunteers mu murenge wa Kavumu yavuze ko hari igihe ubuyobozi bubatererana. Yanavuze ku kibazo cy'ama gilets adahagije. Yagaragaje ko abaturage bubahiriza amabwiriza iyo bababona ariko bajya mu kiruhuko ntibayiteho bakirara.

Urubyiruko rwanagaragaje ko hakiri abaturage bagikora utubari mu ngo ntibanatinye gusinda no gukora urugomo. Ndetse ngo hari aho usanga bamwe mu bayobozi bafatirwa mu bikorwa byo kutubahiriza amabwiriza. Hari abatwara imodoka badafite ubwirinzi nk'ubwo gukaraba intoki.
Hari aho usanga masoko y'amatungo n'ay'ibiribwa ari mato bigatuma abayaremye baba bacucitse.

Coordinator wa YV mu murenge wa Ngororero yavuze ko muri centre ya Ngororero  hakiboneka abantu bajijutse (basobanutse) batita ku mabwiriza.  Hari uduce usangamo abasinzi bivuga ko hari aho utubari tugikora rwihishwa.
Urubyiruko rwagaragaje ko hari aho urwego rwa Dasso rugaragaza imikorere idahwitse rugatererana Youth Volunteers. Ngo hari kandi abaturage barema amasoko ya Kabaya, Rubagabaga, Gashubi Birembo,.. baturutse muri imwe mu mirenge y'uturere duhana imbibi n'akarere ka Ngororero batubahiriza amabwiriza
Umuyobozi w'Akarere yijeje urubyiruko rw'abakorerabushake ubufatanye kugirango imbogamizi zagaragajwe ziveho.
Urubyiruko rwiyemeje kurangwa na discipline no gutangira raporo ku gihe.
Mu gusoza inama umuyobozi w'Akarere yamenyesheje Youth Volunteers ko insengero ziri hafi gufungura bakaba bagomba kongera imbaraga mu gufasha abaturage kubahiriza amabwiriza.