Nyuma y'igihe gito bavuye mu mahugurwa yabereye mw"ishuli rya Police i Gishari Urubyiruko rw'abakorerabushake  rw'Akarere ka Ngororero rwasinyanye n'umuyobozi w'Akarere Bwana Nkusi Christophe imihigo 24 bazesa muri uyu mwaka wa 2022/2023.

Iyo mihigo ikubiye mu bukungu n'imibereho myiza irimo  kurwanya isuri, kwihangira imirimo ( hazabaho ukwezi kwa Hanga umurimo), gushinga amatsinda yo kwizigama, kwizigamira muri Ejo Heza, kwiharika, kurwanya imirire mibi n'igwingira hubakwa imirima y'ibikoni, gukurikirana igikoni cy'umudugudu, kwirinda inda zitifuzwa mu banagavu, kwirinda ibiyobyabwenge, kwimakaza siporo,  kuvana abaturage mu manegeka, gukoresha imbuga nkoranyambaga barwanya abavuga u Rwanda uko rutari, gukumira ibyaha, gukumira amakimbirane mu miryango, kubakira abatishiboye amazu n' ubwiherero, kongera umubare w'abakorerabushake n'iyindi.

Mu mpanuro bahawe n'umuyobozi w'Akarere, inzego z'umutekano babasabye kuzesa iyi mihigo kandi babizeza ubufatanye bwimbitse.
Mayor Nkusi: yabashimiye uruhare rukomeye bagize mu kwesa  imihigo y'umwaka ushize. Yagarutse ku ipfunwe aterwa nuko Akarere ayoboye kaza ku mwanya wa mbere mu kugira abana benshi bafite igwingira. Yasabye urubyiruko nk'imbaraga z'akarere gutanga imbaraga mu gusibanganya iryo pfunwe.
Yavuze ko iyo hataba urubyiruko imihigo yo kubaka uturima tw'igikoni (hubatswe 100 muri buri kagari), kubakira abadafite aho kuba n'ubwiherero itari kweswa. Yabijeje ubufatanye  100%.

Mayor Nkusi yagize ati:
Imihigo ni igipimo cy'imikorere, iyo ubonye umwanya mubi nuko uba warakoze nabi. Yaboneyeho gusaba  urubyiruko  kuvana Akarere ku myanya ya itagahesha ishema.