Kwibuka ku nshuro ya 31 Jenoside yakorewe Abatutsi mu 1994 byakomereje ku rwibutso rwa Jenoside yakorewe Abatutsi rwa Ngororero aharuhukiye inzirakarengane barenga
8,600.
Igikorwa cyitabiriwe na Minisitiri ushinzwe ibikorwa by'Ubutabazi Maj. Gen. Rtd Murasira Albert, Abasenateri n'Abadepite mu Nteko Ishinga Amategeko, Komite Nyobozi y'Akarere, abajyanama mu Nama Njyanama y'Akarere, abayobozi b'Inzego z'Umutekano, abaje kwibuka ababo bashyinguye muri uru rwibutso baturutse imihanda yose, abayobozi n'abaturage b'Umurenge wa Ngororero n'iyo bihana imbibi.

Mu guha ikaze abashyitsi Umuyobozi w'Akarere Bwana Nkusi Christophe yagize ati "bavandimwe mutuye Akarere ka Ngororero mugire umutima ubakomanga mureke guhishira amakuru, murange aho imibiri y'inzirakarengane  iiherereye ishyingurwe mu cyubahiro....
twirinde imvugo n’ibikorwa bibi biganisha ku ngengabitekerezo ya Jenoside, tube hafi abarokotse, tubafate mu mugongo tugoboka abatishoboye."
Senateri  Mureshyankwano Marie Rose yatanze ikiganiro ku mateka ya Jenoside yakorewe Abatutsi. Yavuze uburyo mu gihe
cya mbere y'ubukoloni abanyarwanda bari bunze ubumwe butajegajega, kuri Leta ya mbere n'iya kabiri bakabibwamo amacakubiri yaganishije kuri Jenoside yakorewe Abatutsi mu1994.
Hon Mureshyankwano yavuze ku mwihariko wa Jenoside yakorewe Abatutsi mu Karere ka Ngororero:
- mu cyahoze ari komini Kibirira hageragerejwe Jenoside ;
- padiri mukuru wa Paruwasi ya Nyange yategetse ko kateripirali  iriturira kiliziya ku nzirakarengane zari zayihungiyemo;
- kurekurira inzuki mu inzirakarengane bari bahungiye ku gasozi ka Kesho mu murenge wa Muhanda
- abana 30 bajugunywe mu rwobo ari bazima mu murenge wa Kavumu
- imbwirwaruhame ya Leon Mugesera yahamagariye abaturage kwica abatutsi ngo babanyuze iy'ubusamo (Nyabarongo) ngo basubire muri Etiyopiya
- kuba abarindanga Guverinoma y'Abatabazi baragabye igitero ku batutsi bari bahungiye ku gasozi ka Kesho,....

Yatinze ku mateka yo kubohora u Rwanda, Jenoside igahagarikwa, ubumwe n'ubudaheranwa bw'abanyarwanda bukimakazwa ubu u Rwanda rukaba ruhumeka ituze, amahoro  n'amajyambere.
Yashimiye ingabo zahagaritse jenoside, ubuyobozi bwiza bw'Igihugu cyacu burangajwe imbere na Nyakubahwa Perezida wa Repubulika Paul Kagame washyize umuturage ku isonga.

Ndongozi Phocas yarokotse Jenoside yakorewe Abatutsi.
Mu buhamya yatanze yagarutse ku nzira y'umusaraba yanyuze we na bagenzi bahigwaga, ku bwicanyi ndengakamere  bwakorewe inzirakarengane ubuyobozi burebera.
Yashimiye ingabo zahagaritse Jenoside zikarokora bamwe mu bahigwaga ubu bakaba batanga umuganda wo kubaka u Rwanda.

Abiyingoma Beline ahagarariye imiryango ifite ababo bashyinguye ku rwibutso rwa Jenoside yakorewe Abatutsi rwa Ngororero.
Yagaragaje intimba aterwa no kuba hakiri imibiri itaraboneka ngo ishyingurwe mu cyubahiro.  Yagize ati "kuba hari abadatanga amakuru y'aho iherereye ni ikimenyetso cy'uko ingengabitekerezo ya jenoside icyaritse mu mitima ya bamwe mu baturage.

Intumway IBUKA ku rwego rw'Igihugu Manirarora Annoncée  nawe yashimiye ingabo zarokoye abahigwaga zigahagarika Jenoside.
Yashimiye ubutwari bw'abarokotse bataheranywe n'agahinda ubu bakaba bageze kure biyubaka.
Yashimiye politiki nziza yashyizeho amahirwe angana ku benegihugu bose.
Yagarutse ku bibazo abarokotse Jenoside bagihura nabyo birimo amwe mu macumbi ashaje,
imanza za gacaca zitararangizwa, ingengabitekerezoyaJenosideikigaragara muri bamwe mu baturage....

Umushyitsi Mukuru Minisitiri wa MINEMA Maj Gen Rtd Murasira Albert yagarutse ku buyobozi bubi bwabibye amacakubiri mu banyarwanda, bukimika ingengabitekerezo ya Jenoside  maze asaba buri wese by'umwihariko urubyiruko kwamaganira kure abagishaka kuyibiba mu banyarwanda n'abapfobya Jenoside yakorewe Abatutsi mu 1994.
Yashimiye abarokoye inzirakarengane zahigwaga barangajwe imbere n'Umugaba w'Ikirenga w'Ingabo z'u Rwanda.
Yasabye ababa bazi aho imibiri itaraboneka iherereye kugira umutima wa kimuntu bakaherekana igashyingurwa mu cyubahiro.
Yagarutse ku kibazo cy'imanza gacaca  zitararangira asaba ko cyava mu nzira bityo abarokotse Jenoside yakorewe Abatutsi bakabona ibutabera busesuye.

KWIBUKA KU NSHURO YA 31 JENOSIDE YAKOREWE ABATUTSI KU RWIBUTSO RWA NGORORERO MU MAFOTO