Mu Karere ka Ngororero  hiizihijwe icyumweru cyahariwe serivisi mbonezamikurire y'abana bato ku nsanganyamatsiko igira iti:"Mubyeyi tegura ejo heza h'abawe ushyigikira serivisi mbonezamikurire."

Ababyeyi bongeye kwibutswa kujyana abana mu ngo mbonezamikurire kuko haboneka serivisi ziboneka mu nkingi zikurikira:
Isuku, Imirire, Ubuzima, Umutekano, Uburere buboneye,  Gukangura ubwonko.
Uyu munsi waranzwe no kugaburira abana indyo yuzuye, gupima abana imikurire (ibiro n'uburebure), gutanga inkoko 1,100 n'ibikoresho by'abana mu mu bigo mbonezamikurire.

Igikorwa cyitabiriwe n'Umuyobozi Mukuru wa NCDA Madamu Ingabire Assumpta, abafatanyabikorwa nka Caritas Nyundo/Gisenyi, World Vision, Unicef, Umuyobozi w'Inama Njyanama y’Akarere, Umuyobozi w'Akarere wungirije ushinzwe imibereho myiza y'abaturage, abayobozi b'Inzego z'Umutekano, abayobozi n'abaturage b'Umurenge wa Gatumba.

Umuyobozi mukuru wa NCDA yihanangirije imiryango ko ababyeyi bagomba kuzirikana ku hazaza h'abana babo babaha uburere buboneye hakiri kare; babohereza mu bigo mbonezamikurire bibarinda imirire mibi n'igwingira ngo kuko “Umwana utagwingiye ni ishema ry'umuryango” ushoboye kandi utekanye

Umuyobozi wa Caritas Nyundo/Gisenyi (Umufatanyabikorwa w'Akarere ka Ngororero mu kurwanya imirire mibi n'igwingira) Padiri Rutakisha Jean Paul nawe yongeye kwibutsa ababyeyi kubyaza umusaruro amahirwe bahabwa n'Igihgu kibakunda ku bufatanye n'abafatanyabikorwa bakohereza abana babo mu bigo mbonezamikurire bibaha ubuzima buzira umuze ndetse n'uburere bw'ibanze bubakangura ubwonko ngo kuko “umwana apfa mu iterura.”
Mu Karere ka Ngororero harabarurwa ibigo mbonezamikurire   bisaga 1,260  birererwamo abana barenga 35,100. 
ECD Karambo wizihirijwe iki cyumweru ifite abana 111 abakobwa 55 n'abahungu 56.

KWIZIHIZA ICYUMWERU CYAHARIWE IBIGO MBONEZAMIKURIRE BY'ABANA MU MAFOTO