Hakurikijwe myanzuro n'amabwiriza yafatiwe mu nama yahuje Nyakubahwa Minisitiri w'Intebe, abayobozi b'Uturere, abayobozi b'Inama Njyanama z'Uturere. abahagarariye imirenge, utugari n'imidugudu; muri iki gitondo umuyobozi w'akarere ka Ngororero Bwana Nkusi Christophe, Umuyobozi w'Akarere wungirije ushinzwe imiberho myiza y'Abaturage Madame Mukunduhirwe Benjamine, inzego z'umutekano batangiye gusura ibigo by'amashuli basuzuma ko amashuli yubahiriza amabwiriza ayagenga.

Icyumba cy'umukobwa muri GS Rususa

Harimo gusuzumwa niba amafaranga y'ishuli ikigo gisaba ababyeyi  ahwanye n'ayavuzwe mu mabwiriza ya Minisitiri w'Uburezi, imitangire y' ifunguro ry'abanyeshuli kw'ishuli (abafata ifunguro, abatarifata, umusanzu utangwa n'ababyeyi, stock y'ibiribwa, ibigize ifunguro ry'umunsi, komite ishinzwe ibyerekeye ifunguro, imbogamizi muri gahunda yo kugaburira abana kw'ishuli), isuku ku kigo, isuku ku banyeshuli n'abalimu, isuku mu gikoni, isuku mu bwiherero, isuku aho abanyeshuli barara, inama zakozwe mu kigo n'ishyirwa mu bikorwa ry'imyanzuro yazifatiwemo, imicungire y'umutungo, imicungire y'ibikoresho, imicungire y'ibitabo na mudasobwa, imicungire y'intebe z'abanyeshuli, imicungire y'inyubako z'amashuli (kureba ko inzugi n'amadirishya bifungwa kandi ko inzugi zifite serrure cyangwa ingufuri, kureba ko ibirahuri byose bikiri bizima, kureba ko hari amatiyo amanura amazi,...) icyumba cy'umukobwa n'ibikoresho bijyana nacyo, imitsindire mu mwaka 2021/2022 n'ingamba n'ingamba zo kuzamura imitsindire mu mwaka wa 2022/2023, ibikorwa by'indashyikirwa n'udushya, ibibazo byihariye bibangamiye imikorere myiza y'ikigo n'ingamba zo kubikemura.

Hararebwa kandi ubwitabire bw'abanyeshuli haba mu mashuli y'incuke, abanza, ayisumbuye n'ay'imyuga (abateganijwe kuza, abaje, ababura n'impamvu zabo); umubare w'abarimu (abahari, ababura n'impamvu zabo), ubwitabire bwabo harebwa ibitabo basinyamo buri munsi, kureba ko abalimu bafite ibidanago byuzuzwa neza kandi buri gihe, kureba ubwitabire bwa buri munsi bw'abanyeshuli harebwa uko  ikayi y'ihamagara yuzuzwa.

Umuyobozi w'Akarere yasuye Urwunge rw'amashuli rwitiriwe Mutagatifu Jerome Rususa mu murenge wa Ngororero, VM Asoc yakoreye mu Rwunge rw'Amashuli rwa Kanogo mu murenge wa Muhororo.

Aganira n'abalimu Mayor Nkusi yababwiye ko azi neza uburyo umurimo wabo urimo imvune nyinshi ati ariko iyo ufite discipline, ukwiyemeza (commitment), kugira ibintu ibyawe (ownership) nta ngorane zakugamburuza. Yabibukije uburyo Ubuyobozi bwiza bw'Igihugu cyacu buzirikana imibereho myiza yabo abasaba kurerera u Rwanda batizigamye.