Umuyobozi w'Akarere ka Ngororero Bwana NKUSI Christophe ari kumwe n'Abayobozi b'Inzego z’Umutekano  zikorera mu Karere ka Ngororero, abakozi batandukanye n’ abayobozi b’ amashami  mu Karere  yayoboye inama yagaragarijwemo ibimaze gukorwa n’ ibiteganijwe  mu mushinga Climate Just Communities (CJC) ukorera mu Mirenge ya Kageyo, Kavumu na Muhanda. 

Ni umushinga uharanira imibereho myiza y'abaturage binyuze mu buhinzi, ubworozi no kurengera ibidukikije bigamije guhangana n’ imihindagurikire y’ ibihe. Uyu mushinga ushyirwa mu bikorwa  na Trócaire, ku bufatanye n'umushinga ukurikirana ibijyanye n’imihindagurikire y’ibihe n’iterambere (RCCDN) na DUHAMIC-ADRI.

Muri iyi nama hagaragarijwemo ibimaze gukorwa n’ uyu mushinga harimo gupima ubutaka hagamijwe kumenya inyunganiragihingwa zikenewe gukoreshwa hongerwa umusaruro, gusana amazu y’ abasenyewe n’ibiza 104 hakaba hagiye kubakwa n’andi 60, gukomeza ibikorwa byo gukora amaterasi, gutegura ingemwe z’ ibiti by’ ishyamba, ibivangwa n’imyaka ndetse n’ibyimbuto ziribwa kandi ibikorwa byose bikajyana no kwita kuri gahunda zigamije gufasha umuturage kwivana mu bukene (Graduation).

Mu kwirinda ibiza umushinga ufatanije n’Akarere harihutishwa ubushakashatsi bwo kugaragaza ahashyirwa imirindankuba kandi nayo izashyirweho hagamijwe kwirinda ibiza biturutse ku nkuba haba mu mirenge ukoreramo n’ ahandi. Muri iyi nama itsinda rya Trócaire n’ abafatanyabikorwa bayo ryari rikuriwe na Aime SAFARI KAYINAMURA ari nawe muyobozi w’uyu mushinga.