Ubwo hizihizwaga umunsi w'Umuganura kuri uyu wa 5/08/2022 abawitabiriye babanzaga kumurikirwa umusaruro wavuye mu buhinzi ugizwe n'ibihingwa by'amoko yose birimo 'imbuto (avoka, amatunda, indimu imineke,...), ibinyampeke, ibinyabijumba, ibinyamisogwe (soya. amashaza, ibishyimbo), imboga, ibitoke, ibihaza n'ibindi. Ibi bikagaragaza ko ingo zifite indyo yuzuye ku buryo habaye ubushake abana batahura n'ikibazo cy'imirire mibi n'igwingira.

Ku rwego rw'Akarere umunsi w'Umuganura wizihirijwe mu murenge wa Nyange mu kagari ka Bambiro. Nyuma yo kwerekwa umusaruro wavuye mu bhinzi bw'ibihingwa bitandukanye; itsinda ry'abayobozi riyobowe n'umuyobozi w'Akarere Bwana Nkusi Christophe bahaye abana amata banabagaburira indyo yuzuye.

Aha Mayor Nkusi yabwiye abitabiriye umuganura ko kwita ku bana bitagomba kugarukira aha ko ahubwo bigomba kinjira mu myumvire y'ababyeyi abana bagahorana indyo yuzuye. Yagize ati ko ibiryo bihari nk'uko mwabyerekanye ubwanyu kandi akaba arimwe tubikesha ni mpamvu ki muri zimwe mu ngo zanyu harangwa imirire mibi?

Agaruka k'Umuganura yibukije ko wari umwe mu mihango ikomeye y'i Bwami wahuzaga abanyarwanda b'ingeri zose,.
wari ipfundo ry'ubumwe bw'abanyarwanda ko wari warasibanganijwe n'abakoloni nyuma Leta y'ubumwe ikongera kuwusigasira kuko "nta muco nta terambere".
Ati muze rero dukomere ku muco mwiza twarazwe na ba sogokuru wo gushyira hamwe no gufashanya; abejeje neza bakaganuza abarumbije, abishoboye bagafasha abafite intege nke bityo Umuganura ukomeze utubere  isôoko y'Ubumwe n'Ishingiro ryo Kwigira.

Umunsi waranzwe no kwibukiranya amavu n'amavuko y'Umuganura, ibyiza bywo n'uko wakomeza kuba ipfundo ryo gufashanya no kurwanya imirire mibi mu miryango.