Umuganda rusange usoza ukwezi kwa Nzeri wabereye mu mirenge yose igize Akarere ka Ngororero. Ku rwego rw'Akarere wabereye mu murenge wa Gatumba mu kagari ka Kamasiga. Waranzwe no kubaka imirima y'igikoni no kugaburira abana indyo yuzuye. 
Uyu muganda wahuriranye n'igikorwa cyo gutangiza icyumweru cyahariwe umuryango ukaba witabiriwe n'Umunyamabanga uhoraho muri Minisiteri y'Uburinganire n'iterambere ry'Umuryango Madamu Batamuriza Mireille n'itsinda yaje ayoboye.
Yakiriwe n'Umunyamabanga Nshingwabikorwa w'Intara y'Iburengerazuba Madame UWAMBAJEMARIYA Florence ari kumwe n'Umuyobozi w'Akarere Bwana Nkusi Christophe n'abandi bagize Komite Nyobozi, abayobozi b'Inzego z'Umutekano zikorera mu Karere,  intumwa y'Inama Njyanama y'Akarere, n'Umuhuzabikorwa w'Inama y'Igihugu y'Abagore mu Karere.
Yakira abashyitsi Mayor Nkusi yagize ati:
"Twarahaguritse duhuza imbaraga mu kurwanya icyahungabanya ubusugire bw'Umuryango tuwurinda amakimbirane, ihohoterwa iryo ari ryo ryose, imirire mibi n'igwingira, inda zitateganijwe mu bangavu n'ibiyobyabwenge mu rubyiruko,...twubaka umuryango ushoboye kandi utekanye wuje indangagaciro nyarwanda na kirazira."
Umunyamabanga Nshingwabikorwa @RwandaWest yagarutse ku muryango ushoboye kandi utekanye avuga ko ari umusingi w'iterambere "twifuza". Yashimiye ubuyobozi bwiza bw'Igihugu cyacu  budahwema guharanira iterambere ry'umuryango asaba abaturage guhora bazirikana iyo mpano bahawe na Nyakubahwa Perezida wa Repubulika no kuyibyaza umusaruro.
Umunyamabanga uhoraho muri MIGEPROF yagarutse ku nshingano y'ababyeyi mu muryango asobanura umuryango u Rwanda rwifuza kugirango rukomeze iterambere nta nkomyi. Yashimiye ubuyobozi bwiza bw'Igihugu cyacu burangajwe imbere na Nyakubahwa Perezida wa Repubulika Paul Kagame buhora buzirikana ubusugire bw'ingo n'iterambere ry'abazigize.
Yasabye imbaga y'abaturage bitabiriye umuganda kubyaza umusaruro amahirwe ubuyobozi bwiza "butugezaho" bugamije gushyira umuturage ku isonga. 
Ibindi byaranze umuganda:   
•    Kubakira abadafite ubwiherero/Gusana ubwiherero butujuje ibisabwa muri buri Kagari.
•    Gukora igikoni cy’umudugudu.
•    Gutanga serivisi zitandukanye ahabereye umuganda (Gupima indwara zitandura,  kuboneza urubyaro, ….) 
•    Irangamimerere  
•    Gutanga ubutumwa mu muganda ku kubaka umuryango mwiza no ku bikorwa byo mu cyumweru cy’umuryango .
•    Gutangiza ku mugaragaro ibikorwa by’icyumweru cy’umuryango

Ibiganiro 

1.Umutekano
2..Gushimira abaturage uruhare rw'umuganda mu kunganira ingengo y'Imari y'Akarere  cyane cyane mu bikorwa bya HSI.
3.Gushishikariza abahinzi gukomeza gutunganya igihembwe cy' ihinga 2026 A 
Gukomeza gushishikariza abaturage gukora cyane,kuzigama no kwikura mu bukene ( graduation) no kwishyura Mituweli na Ejo Heza

Ubumwe bwacu, ni zo mbaraga zacu