Uyu munsi tariki ya 3 Nzeri 2021, mu karere ka Ngororero, muri salle ya Paroisse Rususa, habereye amahugurwa y'abayobozi b'amatsinda y'ubufatanye n'ubufashanye bari kumwe n'abayobozi b'utugari .

 Bahuguwe ku gukira ibikomere no gukora ubujyanama bibanda ku gutega amatwi mu gihe bumva ababagana.

 Umuhuzabikorwa wa SEVOTA yabasobanuriye imikorere yayo , ababwira n'uburyo yaguye umushinga Iwacu ni amahoro ukagera mu mirenge yose, n'impamvu abayobozi b'utugari batumiwe kugirango badufashe muri gahunda y' ubumwe mu ngo z' amahoro, abazigize bakaba Bandebereho nabo bakakira neza abantu benshi babagisha inama.

Mme Mujawimana Clarisse  ushinzwe ubuzima bwo mu mutwe ku bitaro bya Kabaya yigishije ku bikomere by'umutima  n'ubudaheranwa. Yasobanuye zimwe mu  mpamvu zitera ibikomere n'ibiranga uwakomeretse :
- Ubukene mu muryango
-Intambara
- Kutitabwaho
- Amateka mabi y'umuryango uvukamo
- Igisuzuguriro

Ibiranga uwakomeretse:
- Kumva ko nta wundi umeze nkawe
- Kwiyanga
- Kumva ari wowe wafashwa gusa
- Kwigunga
- Kwitinya
- Kwitakariza icyizere
- Guhora wikanga abakugirira nabi
- Kwiyanga kandi nawe ukumva nta wundi ugukunda.
- Kwiyahura n'indwara zo mu mutwe.

Mme Mkankuriza Colette  ukora ku Kigo nderabuzima cya Rususa yigishije k'ubujyanama no gutega amatwi.

Yababwiye intambwe zo gutega amatwi neza n'ibiranga umujyanama mwiza.

Habaye kandi ubwunganizi bwa Mme Mukahabeshimana Didacienne ku muco w' ibiganiro mu ngo, gukumira no gukemura amakimbirane mu ngo kandi nta kubogamira uyu n'uyu.

Abanyamabanga nshingwabikorwa b'utugari bagaragaje ibibazo bahabwa ibisubizo. Batanze ibyifuzo banashimira SEVOTA uruhare rukomeye rwayo mu kubaka umuryango nyarwanda binyuze mw'isanamitima

Inama yashojwe hakorwa gahunda y'ubukangurambaga n'abayobozi b'utugari, izatangira bitarenze ku ya 20 Nzeri 2021.