Abakozi b'umushinga MuLaKiLa  ( Mukura and Lake Kivu Landscape Restoration Project) ushyirwa mu bikorwa n'Umuryango ARCOS  bazindukiye mu Karere ka Ngororero aho basobanuye imiterere, imikorere n'imikoranire y'uyu mushinga.
Umunyamabanga Nshingwabikorwa w'Intara y'Uburengerazuba Madamu UWAMBAJEMARIYA Florence afungura imirimo y'iyi nama yagize ati: "imiti ikora ikoranye, gufata neza ubutaka, kubungabunga ibidukikije, guteza imbere umuturage byose ni magirirane. 
Amaterasi y'indinganire n'ayikora, gutera ibiti gakondo, birimo ibivangwa m'imyaka n'iby'imbuto ziribwa bizatuma umushinga tuwugira uwacu kuko ahari ubufatanye byose birashoboka."

Umuyobozi mukuru wa ARCOS Dr Sam Kanyamibwa yagize ati umushinga ni uwa twese udufitiye akamaro  by'umwihariko mu bice by'imisozi miremire nka Ngororero.  Imihindagurikire y'ibihe igira ingaruka mu bice nk'ibi niyo mpamvu ariho umushinga uzashyira ingufu zihariye. 

Gahunda yo guhangana n'imihindagurikire y'ikirere iherekejwe no gufata  ubutaka neza  n'iterambere ry'abaturage ni gahunda y'imyaka 10 y'Umuryango w'Abibumbye yo gusana ibidukikije byangiritse no kubungabunga ibinyabuzima. 
Bityo abaturage bakabona inyungu ku bidukikije bakabana nabyo mu mahoro kuko bo nabyo ari magirirane."

 Uretse gufata ubutaka neza no gutera ibiti umushinga uzafasha abaturage kwizigamira no kwibumbira mu matsinda bakora imishinga iciriritse ibavana mu bukene. 
Ni umushinga uzamara imyaka 30 abaturage bagahinduka abafatanyabikorwa. ARCOS  iri mu rwego rw'imishinga ya Carbon Projects igamije guhangana n'imihindagurikire y'ikirere ku isi yose.

Asobanura umushinga umuyobozi wa MuLaKiLa Amani Mabano yavuze ko ARCOS ari umuryango ubumbye imishinga myinshi irimo umushinga MuLaKiLa  ugamije kubaka uguhangana n’imihindagurikire y’ibihe n’ubuhinzi burambye.
Ufite abafatanyabikorwa aribo Umuhinzi, Reforest Action, AstraZeneca.

Umushinga uzakorera mu turere twa Ngororero na Rutsiro mu mirenge 14  mu tugari 73  n'imidugudu 460.
Mu karere ka Ngororero uzakorera mu mirenge 6  ari yo Muhororo,  Kageyo, Hindiro, Sovu, Ndaro na Bwira, 
Impamvu uturere twa Ngororero na Rutsiro twatoranijwe ni ukubera igitutu cy'ibikorwa bya muntu, imihindagurikire y'ibihe iteye inkeke, ubucukuzi bw'amabuye y'agaciro, amanegeka (kuko 80% by'ubutaka byugarijwe n'isuri) ubukene biharangwa.

Ni umushinga uzakorera mu turere twa Ngororero na Rutsiro (mu tugari 73  n'imidugudu 460) mu mirenge 14 irimo 6 yo mu Karere ka Ngororero ariyo  Muhororo,  Kageyo,  Hindiro, Sovu,  Ndaro na Bwira, 
 Uzibanda ku bikorwa 2 by'ingenzi:

1- gusana hegitari 21,000 haterwa ibiti 6,000,000 ni ukuvuga ibiti 6 ku muturage. Muri byo 50% ni ibiti gakondo. Hari kandi ibiti bivangwa n'imyaka n'iby'imbuto. 
 Hazakorwa amaterasi y'indinganire kuri hegitari 2,450 na hegitari 8,032,5 z'amaterasi y'ikora.

2-kuzamura imibereho myiza y'abaturage169000 mu tugari 73 hatangwa agera kuri 1,000,000,000 frws muri buri kagari yo gukora imishinga iciriritse ibyara inyungu.
Muri rusange MuLaKiLa izagira uruhare mu kurandura ubukene n'inzara. Uzafasha kugera ku burezi bufite ireme, kwimakaza ihame ry'uburinganire, gutanga akazi no kuzamura ubukungu, kubungabunga urusobe rw'ibinyabuzima, gufata neza ubutaka n'izindi gahunda z'igihugu. 

Mu kingurana ibitekerezo umuyobozi w'Akarere Bwana NKUSI Christophe yagaragaje zimwe mu mbogamizi zikigaragara mu buhinzi mu Karere ka  Ngororero: ubutaka busharira/ bwagundutse, imihanda itameze neza ku buryo umusaruro ugera ku isoko bigoye, kongerera agaciro umusaruro (value chain), ubuhinzi bukiri gakondo. Izi mbogamizi umushinga MuLaKiLa uzazivanaho.

Iki gikorwa cyitabiriwe n'Umunyamabanga Nshingwabikorwa w'Intara y'Uburengerazuba Madamu UWAMBAJEMARIYA Florence,  Umuyobozi mukuru wa ARCOS Dr Sam Kanyamibwa, visi perezida w'Inama Njyanama y'Akarere Bwana Sebazungu Modeste,  abagize Komite Nyobozi y'Akarere,  umuyobozi y'Inama y'Igihugu y'Abagore, iy'Urubyiruko n'Iyabafite ubumuga, abakozi b'Akarere n'abakozi b'Umuryango ARCOS.