Kuri uyu wa 19/03/2022 hizihijwe ku nshuro ya 25  ubutwari bwintwari z'Imena z'abanyeshuli b'i Nyange. Ibirori byabimburiwe no gusura inzu y'amateka  agaragaza  ubutwari bw'aba banyeshuli no gushyira indabyo ku gicumbi cy'intwari.

Ubuhamya kuri ubu butwari bwatanzwe na Bwana Sindayiheba Phanuel umwe mu barokotse igitero cy'abacengezi   bibumbiye muri  Association Komezubutwari. Yagaragaje uburyo bakomeye ku bunyarwanda mw'ijoro ryo kuwa 18 rishyira uwa 19/03/1997 ubwo basabwaga n'abicanyi kwitandukanya bakurikije icyo bitaga amoko icyo gihe bagasubiza bati: "Twese turi abanyarwanda".

Ibi birori byitabiriwe na Minisitiri w'urubyiruko n'umuco Mbabazi Rose Mary, Guverineri w'Intara y'Iburengerazuba Bwana Habitegeko François, umuyobozi wungirije w'Ikigo cy'Igihugu cy'Imidari n'Impeta by'Ishimwe (CHENO)  Mukasarasi Godelive n'izindi  intumwa za CHENO n'inzego z'umutekano. Bakiriwe n'umuyobozi w'Akarere Bwana Nkusi Christophe.

Umunsi waranze n'amagambo n'ibirori byarataga ubutwari bw'aba banyeshuli. Mw'ijambo rye Guverineri w'Intara y'Iburengerazuba yagarutse kuri ubu butwari agira ati: " kuba intwari ntibisaba kuba ufite imyaka iyi n'iyi, kuba uri mw'idini runaka cyangwa ngo ube uri igitsina gabo cyangwa gore. Ahubwo bisaba kugira umutima w'ubunyangamugayo n'ubwitange"
 Umushyitsi mukuru Minisitri Mbabazi yagize ati: "abana bato bashoboye ibyananiye abakuru gito. Ati nibabere urugero ibyiciro byose  dukomeze gushyigikira igihuza abanyarwanda aribyo sano muzi y'ubunyarwanda twese dusangiye; twima amatwi abashaka kutuvutsa iyi ndangagaciro." Yakomeje agira ati "ubutwari nibwo bwahanze u Rwanda buri wese akaba asabwa kubukomeraho kuko ni inshingano ntakuka."
Yashimiye abafatanyabikorwa barimo Rhénanie Palatinat bafashije mu kuvugurura inzu y'Amateka y'Intwari z'i Nyange.