Hari ku mugoroba wo kuwa 8/07/2024 ubwo hagwaga imvura itunguranye ivanze n'inkuba nyinshi abantu 6 bakitaba Imana bakubiswe n'inkuba. Mu murenge wa Nyange hapfuye umuntu 1, mu wa Kabaya 2, mu wa Sovu 2 no muri Muhanda1. Ubuyobozi bw'Akarere bwihutiye kwihanganisha imiryango yabuze ababo ndetse no kuyifata mu mugongo ku buryo butandukanye.

Mu kiganiro yagiranye n'ibitangazamakuru umuyobozi w'Akarere Bwana Nkusi Christophe yavuze ko iyi mvura yarimo inkuba nyinshi yaje itunguranye ku mugoroba ahagana mu ma saa mbiri z'ijoro kubw'amahirwe make  hakaboneka imiryango yagiriyemo ibyago, abantu bakaza gukubitwa n'inkuba.

Yakomeje yibutsa abaturage ko igihe imvura irimo inkuba iguye bagomba kwibuka amabwiriza yatanzwe na Minisiteri ishinzwe imicungire y'ibiza akurikira:

- kwihutira kugama mu nzu iri hafi, ukava byihuse mu mazi;

- kwirinda kugama munsi y'ibiti;

- kirazira gukoresha telefone mu gihe cy'imvura nk'iyo;

- kirazira kureka amazi cyangwa gukora indi mirimo hanze mu mvura nk'iyo;

- gucomokora ibyuma byose bikoreshwa n'amashanyarazi;

- kwirinda kwegera hafi y'iminara y'itumanaho cyangwa hafi y'uruzitiro rukozwe mu byuma;

- by'akarusho gushyira imirindankuba ku nyubako.

Nyuma habayeho guherekeza abitabye Imana mu mirenge yavuzwe hejuru. Ubuyobozi bw'Akarere bwabaye hafi imiryango yabuze ababo ndetse bunayifata mu mugongo.

Ni umuhango wagaragayemo umuyobozi w'Akarere, umwungirije ushinzwe iterambere ry'ubukungu Bwana Uwihoreye Patrick, senateri Dr Havugimana Emmanuel n'intumwa ya MINEMA. Abaturage nabo batabaye ari benshi nk'uko bisanzwe mu muco wa kinyarwanda.