Mu rwego rwo gushaka uburyo ibibazo byihariye Akarere gafite byakemuka mu buryo burambye, ubuyobozi bw'Akarere, bamwe mu badepite bavuka mu Karere Hon.
 Eugene BARIKANA Umuyobozi wa Ngororero network, Hon. Damien NYABYENDA, Councillor Eulade BUDENGELI, Mayor w'Akarere ka Ngororero Bwana Nkusi Christophe, Vice Mayor ushinzwe iterambere ry'ubukungu Bwana Uwihoreye Patrick n'Umunyamabanga Nshingwabikorwa  w'Akarere Bwana Bahizi Emmanuel bakoranye inama na Hon. Minisitiri wa Minisiteri y'Imali n'igenamigambi Uzziel Ndagijimana. Inama yabereye mu cyumba cy'inama cya MINECOFIN iyoborwa na Minisitiri. Inama yari igamije gukorera ubuvugizi Akarere ka Ngororero kugirango gafashwe mu kwihutisha iterambere n'imibereho myiza y'abaturage.
Imyanzuro yafatiwe muri iyi nama:
Nyuma yo kugezwaho ibibazo byihariye akarere gafite hafashwe imyanzuro ikurikira:
1) Kwita ku kurwanya isuri;
2) Kwita ku buhinzi cyane cyane hibandwa kukureba uko Akarere kakunganirwa mu kubona ifumbire n'ishwagara;
3) Gufasha Akarere gukora ibikorwaremezo by'umwihariko imihanda ituma kava mu bwigunge n'umusaruro ukagera ku isoko;
4) Minisitiri yemeye ko azatumira inama irimo inzego zose zirebwa n'ibibazo Akarere gafite kugirango bihabwe umurongo urimo gukorerwa inyigo yimbitse igaragaza uko byakemuka.
5) Nyuma y'inama itsinda ryaturutse mu karere ka Ngororero ryaje kungurana ibitekerezo mu ishyirwa mu bikorwa ry'iyi myanzuro, basanga bizarushaho kwihutishwa hasurwa ibigo birebwa n'iyi myanzuro, ubufatanye bw'Ubuyobozi bw'Akarere n'abagize "Ngororero network "
6) Hananzuwe ko Ubuyobozi bw'Akarere bugiye gusura abagize " Ngororero network " babasanga aho batuye mu bice bitandukanye, iyi gahunda ikazasozwa no kubahuriza hamwe bose baza gusura Akarere mu rwego kubashishikariza gushora imari mu Karere bavukamo.

Umyobozi w'Akarere aragira ati: "turasaba ko twongera guhuza imbaraga twongera ku rubuga rwa Ngororero Network abandi bantu tubona ko bagirira akamaro Akarere kacu mu kugateza imbere. Ubumwe bwacu nizo mbaraga zacu ."