Uyu munsi kuwa 16/06/2022 mu Karere ka Ngororero hizihijwe umunsi mukuru mpuzamahanga w'umwana w'umunyafurika ku nsanganyamatsiko igira iti: "Turengere umwana twubake ejo heza".

  Kuri uyu munsi mukuru abayobozi b'imidugudu bagarutse ku bibazo bibangamiye imibereho myiza y'abana harimo ubuzererezi, guta ishuli n'amakimbirane mu miryango basaba inkunga y'ubuyobozi  n'abafatanyabikorwa mu kubishakira ibisubizo.
 Mukantwari Epiphanie, umwe mu babyeyi bari bitabiriye ibirori,  mw'izina ry'ababyeyi bagenzi be yashimiye abayobozi n'umufatanyabikorwa Compassion International  bunganira ababyeyi mu burere bw'abana.

Umuyobozi wa Police nawe yasabye ababyeyi babanye nabi kurekeraho gukurura ibibazo mu bana, bakabarinda imirimo ibavuna n'itemewe nk'ubucukuzi bw'amabuye y'agaciro bugaragara mu murenge wa Gatumba.
Umushyitsi mukuru muri ibi birori yari umuyobozi w'Akarere wungirije ushinzwe imibereho myiza y'abaturage Madame Mukunduhirwe Benjamine.

Yagarutse ku gitera ibibazo bibangamiye imibereho myiza y'abana asaba ubufatanye bwa bose kugirango bibonerwe ibisubizo birambye. Yibukije ababyeyi gushyira imbaraga mu kubyara abo bashoboye kurera, gukora cyane baharanira iterambere ry'ingo zabo. Yashimiye abafatanyabikorwa nka Compassion International yunganira Akarere mu gukemura ibibazo by'abana.

Mu mivugo, mu ndirimbo no mu mbyino abana nabo bagarutse ku burenganzira bwabo basaba ababyeyi n'inzego z'ubuyobozi guhora barwanya icyabuhungabanya.

Madame Mukunduhirwe yagize ati umwana agomba kurengerwa, uburenganzira bwe bukubahirizwa uko bwakabaye nko kugana ishuli, kurya neza, gutekana mu muryango... Yagarutse ku mirimo mibi ikoreshwa abana asaba ababyeyi n'abana kuyigendera kure. Yasabye abana kudahishira abantu bakuru babavutsa uburenganzira bwabo. Yashoje avuga ko  kutita ku burenganzira bw'umwana ari gusenya umusingi igihugu cyubakiyeho. Umunsi waranzwe n'ibirori by'abana birimo imbyino, indirimbo n'imivugo. Washojwe n'ubusabane.