Minisitiri w'Intebe R.Hon. Dr Edouard Ngirente yagiriye uruzinduko rw'akazi mu Karere ka Ngororero.
Yaje kwifatanya n'abaturage gutangiza igihembwe cy'ihinga 2025 B.  Igikorwa cyabereye mu murenge wa Kabaya ahatewe imbuto y'ibirayi kuri site ya Mwendo.

Nyuma y'iki gikorwa Minisitiri w'Intebe yagejeje ku baturage 
ubutumwa  bwa Nyakubahwa Perezida wa Repubulika Paul Kagame bwo gukomeza kubungabunga umutekano no kwitabira umurimo wo soko y'imibereho myiza,  kubaka umuryango ushoboye kandi utekanye  urangwa n'ingo ziteye imbere, abana biga,  uzira amakimbirane, imirire mibi, igwingira n'ibiyobyabwenge.

Abaturage batanze ubuhamya kw'iterambere bamaze kugeraho mu buhinzi n'ubworozi n'uburyo intambwe bamaze gutera itazasubira inyuma.
Nyuma yasuye uruganda rutunganya amabuye y'agaciro mu murenge wa Ngororero.
Yari aherekejwe na Minisitiri w'Ubutegetsi bw'Igihugu Dr Mugenzi Patrice,  uw'Ubuhinzi n'Ubworozi Dr Cyubahiro Bagabe Marc, Minisitiri ushinzwe ibikorwa bya Guverinoma Madame Mpambara Ines, Umunyamabanga wa Leta muri Minisiteri y'Ubutegetsi bw'Igihugu Madamu Kayisire Marie Solange, Umunyamabangawa wa Leta muri Minisiteri y'Ubuhinzi n'Ubworozi Bwana Rwigamba Eric.
Yakiriwe na Guverineri w'Intara y'Iburengerazuba,  Umunyamabanga Nshingwabikorwa w'Intara y'Iburengerazuba, abayobozi,  b'inzego z'umutekano ku rwego rw'Intara n'Akarere, Komite Nyobozi y'Akarere, abayobozi n'abaturage b'Umurenge wa Kabaya.

URUZINDUKO RWA MINISITIRI W'INTEBE MU MAFOTO