Umuyobozi w'Akarere wungirije ushinzwe imibereho myiza Madamu MUKUNDUHIRWE Benjamine yayoboye igikorwa cyo gushyikiriza abana bafite ubumuga inyunganirangingo n'insimburangingo ku nkunga ya Save the Children; yari ihagarariwe n'itsinda ryari riyobowe na MUKANTAGWERA Liliose,  n'itsinda ry'abaganga ba HVP Gatagara basuzumye abana bafite ubumuga 191 mu mirenge yose igize Akarere ka Ngororero.

 Aba baganaga bagaragaje ko muri rusange bakiriye abana bafite ubumuga butandukanye:
1) Abafite ubumuga bw'ingingo butandukanye ku buryo bisaba kugororwa
2)Abana bafite ubumuga bigaragara ko bavutse bananiwe ku buryo bagombye gukomeza gukurikiranwa n'ibitaro.
3)Abana bakeneye kugororwa: aha bagaragaje ko izo serivisi ziri kure y'abaturage kuko zitangirwa ku bitaro gusa bityo abaturuka mu mirenge itandukanye bikabagora kujya ku bitaro bya Kabaya cyangwa Muhororo, bifuza ko byajya bikorerwa no ku bigo nderabuzima.
Abana 17 bakorewe appareils zabugenewe bazajya bakoresha kugeza bagororotse, umwana 1 yahawe igare n'undi umwe ahabwa insimburangingo.
Umuyobozi bw'Akarere wungirije  yashyimiye Save the Children yitaye ku bikorwa byo kwita ku buzima bw'abana kugira ngo bazakure nibura hari ibibazo bimwe byabo byakemutse kandi yizeza abafite ubumuga ko Akarere kazakomeza kwita ku kubateza imbere.

Umukozi wa Save the Children Mukantagwera Liliose yavuze ko bazakomeza kubaba hafi kandi bazakomeza gukora uko bashoboye abana bagakomeza gukurikiranwa.

Save the Children yabashyikirije ibikoresho by'ishuri kugira ngo bazige neza ibaha n'inkunga y'amafaranga ibihumbi mirongo ine(40,000frws) kuri buri mwana yo kunganira ababyeyi kurera abo bana. Iki gikorwa cyitabiriwe kandi na Komite ya NCPD  ku rwego rw'Akarere n'abakozi b'akarere batandukanye hamwe n'inzego z'umutekano.