Kuri uyu wa 28/06/2025 mu murenge wa Hindiro habereye igikorwa cyo gutangiza ku rwego rw'Akarere " Professional Umuganda"

Professional Umuganda ni agashya kahanzwe n'umufatanyabikorwa World Vision Rwanda mu rwego rwo gutera inkunga Akarere ka Ngororero muri gahunda yo kurwanya imirire mibi n'igwingira mu bana bato; kagashyirwa mu bikorwa n'undi umufatanyabikorwa AEE Rwanda.

Yakira abashyitsi, Umuyobozi w'Akarere @cnkusi20 yagaragaje aho Akarere kageze mu guhangana n'imirire mibi n'igwingira avuga ko kavuye kuri 50,5% kakaba kageze kuri 21,7 %.
Mayor Nkusi yanagaragaje ingamba Ubuyobozi bw'Akarere bwafashe mu guhashya imirire mibi n'igwingira harimo kwigisha ababyeyi gutegura indyo yuzuye no kwitwararika isuku ahantu hose.
Yashimiye umufatanyabikorwa World Vision Rwanda uruhare rukomeye mu kurandura imirire mibi n'igwingira n'izindi gahunda zigamije iterambere rirambye ry'umuturage. Yasabye ko ibikorwa bya World Vision byakwagurirwa no mu yindi mirenge.
Umuyobozi wa World Vision Rwanda yashimiye intambwe imaze guterwa mu kurwanya imirire mibi n'igwingira avuga ko ubufatanye buzakomeza ndetse bukagurirwa no mu yindi mirenge 2 yiyongera kuri Matyazo na Nyange.

Guverineri w'Intara y'Iburengerazuba wari umushyitsi mukuru yavuze ko urugendo rwo kurwanya imirire mibi n'igwingira rukiri rurerure ngo kuko nta mwana wavukiye kurya nabi cyangwa kugwingira. Yasabye ababyeyi guhindura imyumvire kuko ibyo kurya bihari.
Yijeje abafatanyabikorwa ubufatanye mu kurwanya imirire mibi n'igwingira mu Turere 7 tugize Intara y'Iburengerazuba.
Yasabye inzego z'ibanze kwegera ababyeyi bagakora ubukangurambaga buhoraho mu kuzamura imyumvire bityo ababyeyi bagahora bazirikana imibereho myiza y'abagize umuryango by'umwihariko abana.
Igikorwa cyaranzwe no kugaburira abana indyo yuzuye no kubaha amata n’ikinamico y'URUNANA yigishije imbaga y'abaturage kwirinda gusesengura umutungo nko kugurisha amagi, inkoko,... ahubwo bakabigaburira abagize umuryango harwanywa imirire mibi n'igwingira.

Igikorwa cyitabiriwe na  Guverineri w'Intara y'Iburengerazuba Hon Ntibitura Jean Bosco, Umuyobozi  w'ingabo ku rwego rw'Intara, Umuyobozi wungirije wa Police ku rwego rw'Intara, intumwa ya NCDA, Umuyobozi wa World Vision, uwa WFP, uwa AEE bose ku rwego rw'Igihugu; Umuyobozi w'Akarere @cnkusi20 n'abandi bagize Komite Nyobozi y'Akarere, Abayobozi b'Inzego z'Umutekano zikorera ku Karere, Umuyobozi wa World Vision Rwanda/ Tunga Cluster, abayobozi n'abaturage b'umurenge ya Hindiro n'iyo bihana imbibi.