Kubufatanye bw’Akarere ka Ngororero n’Umuryango wa PHARP Rwanda, ku inkunga ya MINUBUMWE, taliki ya 14 Kanama 2025, mu cyumba cy’inama cy’Akarere ka Ngororero, habereye inama mpuzabikorwa yabafatanyabikorwa b’Akarere ka Ngororero, mu isanamitima, isanamibanire no kubaka ubudaheranwa. 
Inama yatangijwe n'umuyobozi w'Akarere wungirije ushinzwe imibereho myiza y’abaturage, Madame Benjamine  Mukunduhirwe. Yashimiye Minubumwe, PHARP-Rwanda, Abafatanyabikorwa bose bitabiriye inama uburyo bafatanya mu kwita ku abaturage, by’umwihaririko abo mu Karere ka Ngororero. Yasabye abitabiriye inama gutega amatwi ibiganiro byiza bagiye guhabwa no kurushaho kubigiramo uruhare.
Inama y’itabiririwe n’abayobozi b’imiryango itari iya Leta ikorere mu Karere ka Ngororero bafite ibikorwa bw’isanamitima, Abahagarariye imiryango ishingiye ku myemerere (CATHOLIC,  ADEPR, ADVENTIST, EAR, ISLAM,…) Abahagarariye association z’ubumwe, ubwiyunge n’ubudaheranwa, uhagarariye Avega , uhagarariye IBUKA, Abakangurambaga b’Ubumwe n’ubwiyunge, Abarinzi b’Igihango, Muganga w’isanamitima,  Abakozi bakarere ndetse n’abakozi ba PHARP Rwanda.
Umuhuzabikorwa w’umuryango wa PHARP Rwanda yasobanuriye abitabiriye inama ibikorwa bizibandwaho mu kwezi kwa Kanama na Nzeli 2025 ku inkunga ya MINUBUMWE, anabasaba kuzabigiramo uruhare kugirango intego ziteganyijwe zizagerweho neza kandi ku gihe.
Ibiganiro byatanzwe, byibanze ku Isanamitima, komora ibikomere no gusubiza mu buzima busanzwe abagororwa barangije ibihano ku byaha bya Jenoside yakorerwe abatutsi bagataha mu miryango yabo.
Hakurikiyeho gusangira amakuru y'ibikorwa bitandukanye abafatanyabikorwa b’Akarere barimo gukora bigamije Isanamitima, isanamibanire n’ubudaheranwa, ubuhamya no gufata ingamba zo kwigira ku byiza byagaragaye no gukumira ihererekanya ry’ibikomere mu rubyiruko.
Imyanzuro yafashwe: 
Abahawe ibiganiro basabwe gukomeza gushyira imbaraga mu gufasha abantu bafite ibibazo by’Ihungabana, kwita ku barokotse Genocide yakorerewe abatutsi bafite ibibazo byihariye no gukomeza kuba hafi imiryango y’abarangije ibihano ku byaha bya Genocide yakorerwe abatutsi. 
Hifujwe ko PHARP ifatanije n’abandi bafatanyabikorwa bazategura amahugurwa agenewe abayobozi b’inzego z’ibanze n’abandi bafite inshingano zo kwita no gufasha abaturage mu buryo butandukanye; kuko byagaragaye ko mu Karere ka Ngororero hakiri ibibazo bikomeye by’ihungabana cyane mu rubyiruko n’amakimbirane mu bashakanye.
Abitabiriye inama bishimiye ibiganiro kandi biyemeza gukomeza uruhare rwabo mu bikorwa by’isanamitima no gusubiza mu buzima busanzwe abasoje ibihano ku byaha bya Genocide.