Uyu munsi muri Paroisse ya Muramba mu murenge wa Hindiro abasore n'inkumi barenga 3000 bitabiriye ibirori byo gusoza, ku rwego rw'Igihugu, ukwezi kwahariwe urubyiruko muri Kiliziya Gatolika mu Rwanda.

Umuyobozi w'Akarere ka Ngororero Bwana Nkusi Christophe wari muri ibi birori yakanguriye urubyiruko:

- kwirinda ubunebwe bakihangira imirimo ibateza imbere;
- gukokeresha neza ikoranabuhanga n'imbuga nkoranyambaga  bikababera uburyo bw'ubushakashatsi aho kubagusha mu bushuko;
-  kugira uruhare mu gukumira amakimbirane asenya imiryango.

Mayor Nkusi yagarutse  ku myifatire ikwiye kuranga urubyiruko rw'Igihugu na Kiliziya birinda ingeso zisenya ubunyangamugayo ndetse zikanabaviramo gutakaza indangagaciro z'ubumuntu. Yabibukije kwirinda inda zitateganijwe, ibiyobyabwenge kuko bituma babera Igihugu umuzigo aho kukibera igisubizo.
Yashoje ashimira Ubuyobozi bwa Kiliziya Gatolika muri Diyosezi ya Nyundo ubufatanye n'umusanzu  badahwema kugaragaza muri gahunda z'iterambere ry'imibereho myiza y'abaturarwanda.

Nyiricyubahiro Musenyeri Anaclet Mwumvaneza Umushumba wa Diyosezi Gatolika ya Nyundo yabwiye urubyiruko ati: " turabakunda kuko ari mwe mbaraga za Kiliziya ndetse n'Igihugu muri rusange. Mukomere ku ndangagaciro nyarwanda zituma muba abantu buzuye "
Mu nyigisho ye y'uyu munsi, yakanguriye urubyiruko kwirinda ibyangiza ubuzima bwabo .
Yakanguriye buri wese kubyaza umusaruro ibyo akora ati : "abiga bige neza, abarangije nabo bakoreshe ubumenyi neza."
Musenyeri Mwumvaneza yashimiye urubyiruko imbaraga n'umuhati bagaragaza muri gahunda zose zo kubaka Kiliziya no gushyira muri gahunda icyerekezo cy'iyogezabutumwa ry'umwepiskopi mu ikenurabushyo rya Diyosezi ya Nyundo.
Yasabye urubyiruko kurushaho guteza imbere impano bifitemo n'ibindi byabafasha kwiteza imbere.
Yahamagariye urubyiruko kurushaho kwitangira kiliziya mu nguni zayo zose kuko aribo bayobozi bayo b'ejo hazaza.
Yashoje ashimira ubuyobozi bw'Akarere ubufatanye Akarere ka Ngororero kadahwema kugaragariza Kiliziya Gatolika mu bikorwa by'iterambere.