Guverineri w'Intara y'Iburengerazuba Bwana Habitegeko Francois yagiriye uruzinduko rw'akazi mu Karere ka Ngororero. Yaganiriye n'urubyiruko rwo mu murenge wa Nyange ubwo yasuraga ikigo cy'arwo "Nyange Youth Empowerment Support Services  Center" (YESS Center) areba ibikorerwamo byibanda ku kwigisha urubyiruko imyuga, kurufasha kubona ibikoresho no kwibumbira hamwe ku bufatanye bw'Akarere na World Vision.

Guverineri Habitegeko yasabye ko uru rubyiruko rwiga imyuga rwajya ruhabwa amahirwe yo kubona imirimo ahubakwa ibikorwa remezo. Yabashishikarije kujya bapiganria amasoko ajyanye n'ubushobozi bwabo. Nyuma y gusura aba basore n'inkumi; ku rubuga rwe rwa tweeter ynditse ati: "Nashimishijwe no kuganira n'urubyiruko wumva rufite intego. Bafite indoto nyinshi. They desserve our support" 

Guverineri yanasuye ishuri rya ES Nyange ahari igicumbi cy'Intwari z'Imena. Hasobanuwe amateka y'ubutwari bw'abana b'i Nyange bigaga muri iki kigo, uburyo banze kwitandukanya nk'uko babisabwaga n'abacengezi bagakomera kuri Ndi umunyarwanda kugeza ubwo bamwe muri bo biyemeje guhara ubuzima bwabo bakicwa. Muri ES Nyange hanatashywe ku mugaragaro ibyumba 3 by'amashuri.

Nyuma Guverineri yasuye urwibutso rwa jenoside yakorewe abatutsi rwa Nyange. Yasobanuriwe inzira y'umusaraba yanyuzwe n'inzirakarengane kugeza bishwe urwagashinyaguro nko kuriturirwaho kiliziya bari bahungiyemo.

Uruzinduko rwasojwe n'inama yari itumiwemo abavuga rikumvikana guhera ku rwego rw'isibo kugeza ku rwego rw'umurenge.
Muri iyi nama haganiwe ku ngingo zikurikira:
1.Umutekano
Hagaragajwe ko umutekano mu murenge wa Nyange umeze neza muri rusange usibye ibyaha bihagaragara birimo gutema no kwiba inka ndetse n'ibindi byo kwangiza ibidukikije bishingiye ku bucukuzi bw'amabuye y'agaciro bitemewe n'amategeko. Aha abitabiriye bakanguriwe gukaza amarondo no gukumira abakora ubucukuzi butemewe.

2.Umuco w'ubutwari
Abitabiriye inama basabwe gufata urugero ku butwari bw'abana b'i Nyange bagakomera ku muco w'ubutwari babinyujije ku bikorwa  n'imyitwarire iboneye bya buri munsi no kurangwa no kwanga ikibi.

3.Gukomera ku byiza byagezweho
Abitabiriye inama basabwe gukomeza kubumbatira umutekano, gusigasira ibyagezweho no gukomeza kuba intangarugero muri gahunda za Leta

4.Kunoza imibanire mu muryango
Abitabiriye basabwe gukomeza gushishikariza abaturage kunoza imibanire mu muryango bakumira amakimbirane, kwirinda ubusinzi, kunoza imicungire y'umutungo no guharanira kwiteza imbere.

Abari mu nama bahawe umwanya wo gutanga ibitekerezo no kubaza ibibazo. Hakiriwe abaturage bashima imiyoborere myiza y'Igihugu basaba Governor kubagereza amashimwe yabo kuri Nyakubahwa Perezida wa Repubulika Paul KAGAME. Hakiriwe ibibazo 6 n'ibyifuzo byerekeranye no gusana no kongera ibikorwaremezo.