Mu rwego rwo gukumira no kwirinda Covid-19 amatorero n'amadini ashishikariye kwitegura abayoboke bayo hubahirijwe amabwiriza yatanzwe n'inzego zibishinzwe. Amatsinda y'Akarere afatanije n'ay'imirenge aragenzura niba koko amabwiriza agenda yubahirizwa. Ahenshi imyiteguro iragenda neza kuburyo insengero ziri hafi kongera gufungura.

Itsinda ryaturutse ku Karere riri kumwe n'iry'umurenge wa Kabaya, ryasuye insengero 4 n'imisigiti 2. Itsinda ryasanze bariteguye gusa bagiriwe inama yo gutondeka neza ibyo bateguye bibafasha kwirinda no kurwanya COVID-19, cyane cyane ibijyanye n'isuku n'isukura.

Igikorwa cyayobowe n'umuyobozi w'akarere wungirije ushinzwe imibereho myiza y'abaturage Madame MUKUNDUHIRWE Benjamine ari kumwe n'inzego z'umutekano.

Mu murenge  wa Gatumba hasuwe insengero 5 n'umusigiti 1, harebwa imyiteguro yo gufungura uko ihagaze, murwego rwo kubahiriza amabwiriza yo kurwanya no gukumira ikwirakwizwa rya COVID-19.
Igikorwa cyari kiyobowe na Madame MUKAMWEZI Cansilde umuyobozi wa RIB mu Karere ka Ngororero

Mu murenge wa Nyange itsinda riyobowe n'umuyobozi wa Police mu karere ryasuye insengero 4. Naho ryasanze imyiteguro igeze kure.

Ahasuwe  hose imyiteguro imeze neza kuko ibisabwa byari bihari ndetse ubona ko nibyo basabwe gukora mu kwitegura gufungurirwa babyubahirije nk'uko byateganwaga n'amabwiriza ya Leta.

Mu karere ka Ngororero harabarurwa amatorero 29 afite insengero zigera kuri 402.