"Mubyeyi ndera neza maze nkure nemye" ni amwe mu magambo ari kugaruka mu mbyino z'abanyeshuli bari mu birori byo kwizihiza umunsi mpuzamahanga w'umwana w'umunyafurika n'ubukangurambaga ku burere buboneye mu muryango.
Ibarori byaranzwe n'impanuro zitandukanya zaba iz'abana ndetse n'iz'abakuru.
Intumwa y'Umuryango ASOFERWA  yatanze ubutumwa bwagenewe abanyeshuli bujyanye no kwirinda SIDA n'IGITUNTU.
Abarezi n'ababyeyi basabwe kuganiriza abana kugira ngo bamenye uko bagomba kwirinda bakure bafite ubuzima buzira umuze bo mbaraga z'Igihugu zizubaka u Rwanda rw'ejo.
Umuyobozi w'Akarere Bwana NKUSI Christophe yibukije abanyeshuli ko bagomba kugendera kure ababashukisha ubusa busa bikaba byabaviramo ingaruka mbi mu buzima. Yabasabye gukunda umurimo wo kwiga kugirango bazagire ejo hazaza heza babereye igihugu.
Yabasabye guca ukubiri n'ingeso mbi zabatesha umurongo wo kwiga nko gufata n'ibiyobyabwenge no kwiyandarika.
Meya Nkusi yibukije ababyeyi n'abarezi kwita ku bana bakabarinda icyabashora mu ngeso mbi bakabatoza indangagaciro nyarwanda zirimo ubutwari, gukunda igihugu no kugikorera, gukunda umurimo bategura ejo heza.
Yagarutse ku ireme ry'uburezi asaba abalimu n'abanyeshuli guhuza imbaraga bagatanga umusaruro igihugu kibatezeho.
Ibirori byaranzwe kandi n'imikino itandukanye yahuje amakipe y'ibigo by'amashuri mo guhemba abarushije abandi.
Byitabiriwe kandi n'abayobozi b'inzego z'umutekano, abayobozi n'abaturage b'umurenge wa Ngororero, abayobozi b'ibigo by'amashuli y'inshuke, abanza, ayisumbuye, ay'imyuga n'ubumenyingiro; ababyeyi n'abanyeshuli.