Umwiherero w'iminsi 2 waberaga i Rubavu  muri Kivu Peace View Hotel 04-06/03/2022 wari uhuje abajyanama b'Akarere na bamwe mu bakozi b'Akarere washojwe.
Muri uyu mwiherero hacukumbuwe ibibazo byagaragajwe n'abaturage mu cyumweru cyahariwe Umujyanama, hatangwa raporo y'ibibazo bibangamiye imibereho myiza y'abaturage (Human Security Issues) , imihigo y'Akarere, ingengo y'imari ivuguruye ndetse n'imikorere n'imikoranire.

Ku bibazo bibangamiye imibereho myiza y'abaturage havuzwe cyane ku mirire mibi n'igwingira rikigaragara hirya no hino mu mirenge, ukuva mw'ishuli kw'abana, no gutura heza ku batishoboye n'abasenyewe n'ibiza.

Ku bijyanye n'imihigo hibukijwe ko igomba kweswa neza uko yakabaye aho bigaragara ko hari ikiri inyuma hagashyirwa imbaraga by'umwihariko. Ibi bikaba bisaba imikorere n'imikoranire izira amakemwa kugirango imihigo yeswe, abaturage babone serivisi nyazo zituma batera imbere.

Ibindi bibazo byagarutse kenshi mu cyumweru cyahariwe umujyanama (Umujyanama week) ni ibijyanye n'ibikorwa remezo birimo imihanda itameze neza ihuza imirenge, iyo mu nzuri za Gishwati yangiritse bikaba bibangamira kugeza umusaruro w'amata ku ikaragairo rya Mukamira, ibiraro bidahagije n'ibishaje bikeneye gusanwa, amazi n'amashanyarazi bikiri bicye, amashuli y'imyuga adahagije (nko mu mirenge ya Kageyo, Kavumu na Sovu  ntayo bagira), amashuli y'ibanze y'imyaka 12 ataragwira bigatuma hakiri abana bakora ingendo ndende, amavuriro yunganira (postes de sante) adakora neza.

Mu gusoza uyu mwiherero Bwana Emmanuel BAHIZI, Umunyamabanga nshingwabikorwa w'Akarere wari uhagarariye Komite Nyobozi yijeje Inama Njyanama y'Akarere ko bagiye kongera imbaraga nyinshi mu kubona ibisubizo  by'ibibazo byinshi byugarije abaturage.
Madamu Jeannette Nyiramasengesho, Umuyobozi w'Inama Njyanama y'Akarere yasabye ko gukora nk'ikipe, kwishakamo ibisubizo, gukangurira abaturage kugira uruhare mu bibakorerwa, gukemura ibibazo haherewe ku byihutirwa bizatuma Akarere kagera ku iterambere rirambye kandi ryihuse.

Iki cyumweru cyahariwe umujyanama cyaranzwe kandi no kurwanya imirire mibi hakorwa imirima y'ibikoni mu mirenge yose. Abaturage kandi banahawe umwanya uhagije wo kwinigura batanga ibitekerezo byazibandwaho mi igenamigambi ry'umwaka wa 2022/2023.