Kuri uyu wa 12/04/2022 mu bitaro bya Kabaya habereye igikorwa cyo kwibuka ku nshuro ya 28 Jenoside yakorewe Abatutsi hibukwa abarwayi, abarwaza n'abakozi biciwe muri ibi bitaro bazira uko baremwe.

Iki gikorwa cyabanjirijwe no kunamira inzirakarengane zishyinguye mu rwibutso rwa Jenoside yakorewe Abatutsi rwa Kabaya hashyirwa indabyo kuri uru rwibutso.
iki gikorwa cyitabiriwe n'umuyobozi w'Akarere Bwana Nkusi Christophe ari kumwe n'abayobozi b'Akarere bungirije bombi, umuyobozi mukuru w'ibitaro bya Kabaya, inzego z'umutekano, imiryango y'ababuze ababo muri ibi bitaro n'abakozi babyo.
Bakurikiranye ikiganiro ku nsanganyamatsiko igira iri: "Twahisemo kuba umwe"
Aha ku Kabaya niho  Mugesera Leon  yavugiye imbwirwaruhame ihamagarira abajenosideri kwica abatutsi bakabajugunya mu mugezi wa Nyabarongo.
Abitabiriye kwibuka ku nshuro ya 28 Jenoside yakorewe Abatutsi mu bitaro bya Kabaya bakurikuranye ubuhamya bw'umwe mu baharokokeye Bwana Mukunzi JMV.

Yagarutse ku nzira y'umusaraba banyuze ubwo bahigwaga avuga ko iriya mbwirwaruhame ya Mugesera yatumwe abatutsi bicwa ari benshi kandi urw'agashinyaguro. Yashimiye ubuyobozi bw'ibitaro bya Kabaya butahwemye kwita ku baharokokeye bubaremera.

Umuyobozi w'Akarere Bwana Nkusi Christophe we yagize ati kwa muganga niho abarwayi baba bizeye kubona ubuzima ati ariko Abatutsi bari mu bitaro bya Kabaya barabuhaburiye. Yihanganishije abarokotse abasaba gukomeza gutwaza mu mibereho ya buri munsi.
Yashimiye ubuyobozi bwiza bw'Igihugu cyacu, ingabo zahagaritse Jenoside ubu abanyarwanda bakaba batekanye mu bumwe n'ubwiyunge. Yanenze abantu bakiri inzitizi ku bumwe n'ubwiyunge bazi ahari imibiri itarashyingurwa bagaceceka.
Igikorwa cyo kwibuka Jenoside yakorewe Abatutsi mu bitaro bya Kabaya cyashojwe no kuremera uwarokotse Jenoside muri ibi bitaro inka y'ishashi. Abaharokokeye bashimiye ubuyobozi bw'ibi bitaro uburyo buhora bubazirikana bukabafasha mu mibereho yabo.