Minisitiri ushinzwe ibikorwa  by'ubutabazi  Maj Gen (Rtd) Albert Murasira  yagiriye uruzinduko rw'akazi mu Karere ka Ngororero.
Yaje kureba:
-Uko guhangana n'ibiza bihagaze muri aka Karere
-Ubuziranenge bw'amazu ari kubakirwa abaturage
basenyewe n'ibiza.

Mu nama ya DIDIMAC (District Disaster Management Committee)
Umuyobozi w'Akarere Bwana Nkusi Christophe yamugaragarije icyegeranyo cy'uko ibiza byibasiye Akarere ka Ngororero muri Gicurasi
2023  aho byahitanye abantu 23 bikangiza ibikorwaremezo n'imitungo y'abaturage.
Mayor Nkusi yanerekanye ingamba zafashwe mu guhangana nabyo, aho kubakira abasenyewe n'ibiza bigeze n'imbogamizi zagiye zigaragara.
Yasabye ko haboneka imashini ihoraho yajya isunika inkangu (land slides) igihe zafunze umuhanda.

Minisitiri Murasira yagarutse ku bucukuzi bw'amabuye y'agaciro bwangiza ibidukikije avuga ko bwakagombye guhagarara. Yashimangiye ko imicungire y'ibiza iri mu nshingano z'Akarere.  Yanavuze ko aho bishoboka amatungo  n'imyaka bigomba kujya mu bwishingizi.

Yibukije ko imikorere n'imikoranire hagati ya Sector Disaster Management Committee (SEDIMAC), District Disaster Management Committee (DIDIMAC) na National Disaster Management Committee (NADIMAC) igomba kuba ntamakemwa.
Yakiriwe n'Umuyobozi w'Akarere ari kumwe n'abagize DIDIMAC  barimo abagize inama y'umutekano itaguye y'Akarere. Yaje aherekejwe n'Umuyobozi Mukuru muri MINEMA ushinzwe Politiki, Igenamigambi no Gukumira Ibaza Bwana Adalbert Rukebanuka.