Minisitiri ushinzwe ibikorwa by'ubutabazi akaba n'imboni ya Guverinoma mu Karere ka Ngororero Hon Kayisire Marie Solange yifatanije n'abaturage b'aka Karere  mu muganda ngarukakwezi  wabereye mu murenge wa Muhororo mu kagari ka Myiha harwanywa isuri ku musozi wa Bukekera.
Nyuma y'umuganda abaturage bagejejweho ubutumwa  bujyanye no kuboneza urubyaro , kurwanya imirire mibi n'igwingira no kwizihiza umunsi mukuru w'intwari uzaba tariki ya 1/02/2023.

Minister Kayisire yibukije abaturage ibyiza byo kurwanya isuri mu Karere k'imisozi ihanamye nka Ngororero avuga ko ubu ugomba kuba umuhigo wa buri wese. Yibukije ko kuringaniza imbyaro bitareba abagore gusa ko n'abagabo babifitemo uruhare rukomeye.
Yanabaganirije ku munsi w'Intwari uzizihizwa kuwa 1/02/2023. Yanagarutse ku isuku igomba kuba umuco mu baturarwanda, kuboneza urubyaro abana bateganirizwa Ejo Heza.
Nyuma y'umuganda habayeho gusura urugo mbonezamikurire rwa Kibingo mu murenge wa Muhororo.

Abana bagaburiwe indyo yuzuye. Yaganiriye n'ababyeyi abasaba guhindura imyumvire bakagaburira abana indyo yuzuye babarinda imirire mibi, kuboneza urubyaro babyara abo bashoboye kurera
Uyu munsi kandi abaganga bakoze umuganda ushingiye ku bumenyi batanga urukingo rwa Covid-19, bapima Covid-19 n'indwara zitandura.
Abadepite mu Nteko Ishingamategeko nabo bifatanije n'abaturage mu muganda ngarukakwezi mu bikorwa byo kurwanya isuri. Hon. Manirarora Annoncée yari mu murenge ya Kageyo naho Hon. Ndagijimana Leonard yari mu murenge wa Sovu.