Minisitiri ushinzwe ibikorwa by'ubutabazi akaba n'imboni y'Akarere muri Guverinoma Hon. Kayisire Marie Solange ari mu ruzinduko rw'akazi mu Karere ka Ngororero.
Yasuye abahinzi bashya bashaka kwagura ubuso buhinzeho icyayi na koperative y'abahinzi b'icyayi COTRAGAGI ikorera mu mirenge ya Muhanda, Kavumu, Sovu, Kageyo yo mu Karere ka Ngororero na Jomba na Muringa yo mu Karere ka Nyabihu. Iyi koperative ihinga icyayi ku buso bungana na hegitari 935.936, ifite abanyamuryango
1,765. Irimo kwagura ubuso buhinzeho icyayi kuri hegitari 170.

Uruganda rw'icyayi rwa Rubaya Mountain Tea iyi koperative igemuramo icyayi rukora toni 45  ku munsi nyuma yo kwagura ubuso buhinzeho icyayi barateganya  gukora toni 100 ku munsi. Ikilo cy'icyayi kibisi  kigura 400 frws. Hari umuhinzi w'icyayi uhembwa miliyoni 5 buri kwezi.
Minister Kayisire aganira n'abahinzi b'icyayi  yababwiye ko: "niba abaturage babona amafaranga ahagije bigomba kujyana n'imibereho myiza izira imirire mibi". Yongeyeho ko Akarere ka Ngororero gafite icyasha cy'igwingira n'imirire mibi kagomba kwiyuhagira kigasibangana.

Yanavuze ko imihanda ijyana umusaruro ku ruganda igomba kuba itunganye  ku bufatanye bw'abaturage n'abayobozi.
Mu buhamya yatanze, Nzabakurikiza Juvenal yavuze ko yarihiye abana 8 amashuli ya kaminuza, ko yinjiza miliyoni n'igice buri kwezi, ko yizigamira muri EJO HEZA we n'abamukomokaho, ko yishyurira ubwisungane mu kwivuza we n'abamukomokaho ko afite amatungo n'amasambu kandi akaba atuye heza kubera ubuhinzi bw'icyayi.

Byagaragaye ko abaturage bafite inyota yo gihinga icyayi kuko bamaze kubona inyungu nyinshi ivamo.
Nyuma yo gusura abahinzi bashya bashaka kwagura ubuso buhinzeho icyayi na koperative y'abahinzi b'icyayi Cotragagi Minister yasuye uruganda rw'icyayi  Rubaya Mountain Tea Factory abasaba kwagura ubuso bw'icyayi no gutegura ingemwe zo guha abahinzi bifuza kwagura imirima y'icyayi. Ubuyobozi bw'uruganda bwamugaragarije uburyo bateganya kuzamura umusaruro ukava kuri toni 45 ukagera kuri toni 100 ku munsi. Banamweretse imikoranire myiza n'abahinzi bashya b'icyayi biyemeza kubashyigikira kugirango imishinga bafite izabageze mw'iterambere bifuza.