Kuri uyu wa 4/11/2022 Minisitiri ushinzwe ibikorwa by'ubutabazi Hon. Kayisire Marie Solange akaba n'imboni ya  Guverinoma mu Karere ka Ngororero yagiriye ruzinduko rw'akazi muri aka Karere.
Yasuye ibikorwa byo kurwanya isuri  hifashishijwe amaterasi y'indinganire mu murenge wa Kabaya akagari  Gaseke. Yagiye ajya inama y'ibyakorwa kugirango igikorwa cyo kurwanya isuri kirusheho kugenda neza.harimo ko ibisigara biri hafi y'ingo bigomba kurwanywaho isuri hacukurwamo imirwanyasuri kandi hanaterwamo ibyatsi bituma ubutaka butagenda. Yanageze ahari ubuhumbikiro bw'ibiti bivangwa n'imyaka asaba ko byakwirakwizwa mu baturage bigaterwa muri iki gihe imvura yabonetse

Minister Kayisire yasuye kandi uruganda rwenga umutobe witwa Akaruhura hifashishijwe ibimera birimo tangawizi, rosemary na thym mu  kagari ka Kabaya. Yashimiye uwagize igitekerezo cyo gushinga uruganda n'uburyo yahaye akazi abakozi barimo abadamu. Yasabye ko ibikoresho by'ibanze (raw materials) byakongerwa kandi bikaboneka hafi kugirango uruganda rutange umusaruro utubutse.
Yashoje uruzinduko rwe aganira n'abaturage b'umurenge wa Kabaya.
Mu kumuha ikaze umuyobozi w'Akarere Bwana Nkusi Christophe yagarutse ku gikorwa cyo kurwanya isuri asaba abaturage kukigiramo umwete muri gahunda yiswe "ubutaka bwanjye umurage wanjye". Yasabye Minister Kayisire  ubuvugizi bwo kuzabona ibigega bihagije bifata amazi muri gahunda ya nkunganire;  "kuko ava ku bisenge ari menshi agatwara ubutaka ndetse agakurura n'ibiza."
Mu nama yagiranye n'abaturage Minister Kayisire yagarutse ku kibazo cy'imirire mibi n'igwingira asaba abaturage kwhanagura iki cyasha mu gihe cyihuse.
Abaturage bahawe umwanya wo gutanga ibitekerezo n'ibibazo byose bihabwa umurongo.