Minisitiri w'ubutegetsi bw'Igihugu Hon. Gatabazi Jean Marie Vianney yagiriye ruzinduko rw'iminsi 2 (20-21/3/2022) mu Karere ka Ngororero. Yabanje gusura uruganda rw'icyayi rwa Rubaya agaragarizwa ishusho y'uruganda, umusaruro warwo,  n'uburyo rufasha abaturage kwivana mu bukene.Yasanze hari ibikorwa uruganda rufashamo abaturage barukikije nko kubaka amashuli, kubakira abatishoboye n'irerero ry'abana bato.

Minisitiri yabagiriye inama y'ibyakorwa kugirango uruganda rurusheho kugirira akamaro abaruturiye by' umwihariko  abafite amikoro make kabone nubwo baba badafite aho bahuriye narwo. Yatanzwe urugero nko kubagezaho ibyo bakeneye nk'ibiribwa ku buryo butabavunnye.
Umuyobozi mukuru w'uruganda yavuze ku mihanda itameze neza, ifumbire  ibageraho  ihenze, kutagira ubutaka bwo kwaguriraho imirima ihinzemo icyayi.
Yagaragaje amahirwe y'uruganda arimo  imikoranire
myiza n'ubuyobozi, abaturage bashishikarira guhinga icyayi.
Yatanzwe icyifuzo cyo kubona urwuri bakororeramo kugirango haboneke ifumbire y'imborera yo kunganira imvaruganda ihenze. Bagiriwe inama yo gukorana n'aborozi bo mu nzuri za Gishwati kuburyo babona iyo fumbire bifuza.
Umuyobozi w'uruganda yasabye ko inzuri ziri mu mirima y'icyayi rwagati  zahindurwamo imirima y'icyayi. Minister yabagiriye  inama yo kumvikana na bene izo nzuri.
Nyuma yo kuganira hakurikiyeho gusura uruganda.Yaganiriye n'abakozi bamubwira ko bakorana ubwitange ngo bazamure umusaruro.
 Nyuma Ministre Gatabazi yagiranye inama na Guverineri, abagize Inama Njyanama y'Akarere, Komite Nyobozi, abikorera, sosiyete sivile, inzego z'umutekano n'abandi bavuga rikumvikana. 

Umuyobozi w'Akarere Bwana Nkusi Christophe yabagaragarije aho Akarere kageze mw'iterambere amahirwe gafite mu kuryihutisha n'ibibazo birikoma mu nkokora.

Nyuma yo  kungurana ibitekerezo abari mu nama biyemeje ubufatanye bwimbitse kugirango Akarere gatere intambwe igaragara mw'iterambere. Mu rwego rwo kumenyekanisha Akarere biyemeje gushyiraho ikipi y'umupira w'amaguru. Ibibazo byagaragajwe birenze ubushobozi  bw'Akarere Minisitiri Gatabazi yiyemeje kuzabikorera ubuvugizi.
Ku munsi wa 2 w'uruzinduko rwe Minisitiri w'ubutegetsi bw'Igihugu Hon. Gatabazi Jean Marie Vianney yagiranye inama n'abakozi kuva ku kagari kugera ku Karere.
Umuyobozi w'Akarere Bwana Nkusi Christophe yagaragaje imiterere y'ikibazo cy'abakozi badahagije haba mu bitaro, mu tugari, imirenge no ku Karere. Yanagaragaje ko ahatangirwa service zimwe na zimwe hakwiriye kuvugururwa: Inyubako y'Akarere,  imirenge 6 n'utugari 36 kimwe n'inyubako z'ibitaro bya Muhororo zishaje.
Minisitiri Gatabazi yabwiye abakozi ko abazaniye indamutso ya Nyakubahwa Perezida wa Repubulika abasaba guhindura imikorere buri wese akagira igishya yinjiza mu mikorere ye.
Yabibukije ko bagomba kumenya no gusobabukirwa neza inshingano zabo kandi bagahora bisuzuma; gukomera ku murimo bakawuha agaciro gakwiriye; kudatekereza umushahara mbere y'akazi; guhoza unuturage kw'isonga. Ni muri urwo rwego yasabye ko abaturage bagomba gufaswa
kurwanya isuri mu gihe y'imyaka 2 gusa ikaba itagitwara ubutaka.

Yashimiye abakozi kuba baragize uruhare rukomeye mu kurwanya Covid-19 ikaba igenda icika intege.
Nyuma yo kuganira n'abakozi Minisitiri Gatabazi yagiye mu murenge wa Kavumu aganira n'abahinzi b'ibirayi. Bamugejejeho ikibazo cy'imbuto ibageraho ihenze kuko iva i Musanze asaba abakozi ba RAB kubafasha gukora ubutubuzi bw'imbuto. Banavuze ku kibazo cy'umuhanda ugiye gucika kuburyo bafite impungenge zo kugeza umusaruro wabo kw'isoko.
Aganira n"itangazamakuru Hon. Gatabazi yashimiye abaturage b'Akarere ka Ngororero by'umwihariko abikorera bafite ubushake bwo guteza imbere Akarere kabo.Yagarutse ku buryo abaturage bagomba guhabwa serivisi nziza. Yagarutse kandi  ku masuri atwara ubutaka yibutsa ko mu gihe cy'imyaka 2 kigomba kuba cyakemutse. Yanavuze ko azakora ubuvugizi ku bibazo bisaba ingengo y'imali iremereye ngo bibonerwe ibisubizo . Yagarutse ku mirire mibi asaba abaturage kurirandurana n'imizi babifashijwemo n'abayobozi.
 Yongeye kwibutsa abayobozi ko bagomba gukemura ibibazo by'abaturage ku gihe bakabarinda gusiragira ku biro byabo.

Minisitiri Gatabazi n'abo bari kumwe bafashe umwanya wo kunyura ku Mukore wa Rwabugiri mu murenge wa Kageyo hamwe mu hantu nyaburanga mu Karere ka Ngororero; asobanurirwa amateka yaho. Yasabye ko hashyirwa ibikorwa byabyazwa umusaruro ba mukerarugendo bakahayoboka ari benshi.
Avuye mu murenge wa Kavumu yasuye sosiyete zicukura amabuye y'agaciro  mu mirenge ya Ngororero na Gatumba.
Yasobanuriwe imikorerere y'ubucukuzi bw'amabuye y'agaciro butangiza ibidukikije hakoreshejwe tekinoliji igezweho. Yasabye ko ubucukuzi bw'amabuye y'agaciro butemewe n'amategeko bwacika burundu.

URUZINDUKO RWA MINISITIRI GATABAZI MU MAFOTO