Umukozi w'Ikigo cy'Igihugu gishinzwe guteza imbere Inzego z'Ibanze LODA Bwana Bazirema Eric ari mu karere ka Ngororero mu gikorwa cyo gukurikirana imitangire y'inkunga y'ingoboka igenewe abagore batwite n'abana batarengeje imyaka 2 babarizwa mu miryango ifite amikoro make(Nutrition Sensitive Direct Support- NSDS).

Iyi nkunga ni imwe mu nkingi zigize gahunda ya Leta igamije kurwanya imirire mibi n'igwingira kuva umwana agisamwa kugeza agize imyaka 2.
Ibi bikorwa hatangwa inkunga y'amafaranga kugirango:

- bongererwe ubushobozi bwo kubona no gutegura ifunguro ry'umubyeyi n'umwaka;

- bashishikarizwe kandi boroherezwe kwitabira serivisi z'ubuvuzi zifasha mu gukurikirana imikurire y'umwana n'imirire ye mu minsi 1000 ya mbere y'ubuzima.

Inshingano ugenewe iyi nkunga agomba kuzuza:
Umugore utwite agomba kwipimisha inshuro 8 zateganijwe na Minisiteri y'ubuzima kandi akazabyarira kwa muganga.
Naho umubyeyi ufite umwana utarengeje imyaka 2 nyuma yo kubyara ajya kwa muganga nibura inshuro 2 mu byumweru 6 bibanza kugirango bamufashe gukurikirana ubuzima bwe n'ubw'umwana; agomba kandi kubahiriza gahunda zo gukingira umwana zitangwa n'ikigo nderabuzima cyangwa Abajyanama b'Ubuzima; kubahiriza gahunda mbonezamikurire itangwa n'ikigo nderabuzima n'Abajyanama b'Ubuzima; asabwa kandi kwitabira gahunda zo kuringaniza urubyaro.
Izindi nshingano:
Uwagenewe inkunga agomba kwita ku mikurire y'umwana yorora amatungo mato (nibura inkoko 2 zitanga amagi); gutera nibura ibiti 2 by'imbuto; kugira umurima w'igikoni utunganije kandi utanga umusaruro.
Agomba kandi kwita ku isuku n'isukura bigaragarira mu kugira isuku ku mubiri no ku myambaro muri rusange; kugira ubwiherero bufite isuku kandi bupfundikirwa; kugira isuku aho barara no mu gikoni.

Uwagenewe inkunga agomba kwitabira Ibikorwa by'iterambere nko kujya mu matsinda yo kubitsa no kugurizanya ari nako aharanira kwigira no guteganyiriza Ejo Heza.