Mu Karere ka Ngororero mu murenge wa Matyazo habereye igikorwa cyo gutangiza ku rwego rw'Igihugu icyumweru cyahariwe ubuzima bw'Umubyeyi n'ubw'Umwana. Uyu muhango waranzwe no gupima abana ibiro, uburebure n' ibizigira by'ukuboko.

Hatanzwe n'ibinini by'inzoka n'ibya vitamine, ifu ya ongera n'amata.
Uyu muhango witabiriwe n'Umunyamabanga uhoraho muri minisiteri y'Uburinganire n'iterambere ry'umuryango Madame Batamuliza Mireille, Umyobozi mukuru wa RBC Prof.Claude Mambo Muvunyi, intumwa za minisiteri y'ubuzima, abafatanyabikorwa batandukanye barimo WHO, Unicef, World vision, USAID, Care International, Caritas, Imbuto foundation; inzego z'umutekano, abanyamabanga nshingwabikorwa b'imirenge, abakozi bo bigo by'ubuzima (ibitari n'ibigo nderabuzima), abajyanama b'ubuzima n'abaturage. Insanganyamatsiko iragira iti: "Tunoze isuku turinde abana indwara zibatera kugwingira"
Abashyitsi bakiriwe n'umuyobozi w'Akarere wungirije ushinzwe iterambere ry'ubukungu Bwana Uwihoreye Patrick wavuze uko Akarere ka Ngororero gahagaze mu kubungabunga ubuzima bw'Umubyeyi n'ubw'Umwana. Yagize ati iki cyumweru kirasiga duteye intambwe ishimishije.

 Mu kiganiro yagiranye n'itangazamakuru yavuze ku ngamba Akarere gafite nko kuba imiryango ibayeho neza izajya iganuza itishoboye kandi hakabaho ikurikurana. Yavuze ko Akarere gahanganye n'ubuharike guhera mw'isibo aho abagabo bakangurirwa kwirinda gushinga ingo nyinshi. Yavuze ko kugwingira bidaterwa no kubura ibiribwa ahubwo biterwa n'imyumvire ya bamwe ikiri hasi.

Umunyamabanga uhoraho muri Minisiteri y'uburinganire n'Iterambere ry'Umurayngo yahamagariye ababyeyi kubyara abo bashoboye kurera kuko bigabanya ibibazo bijyanye n'imirire mibi n'igwingira. Yavuze ko icyihishe inyuma y' ibi bibazo ari imyumvire y'abaturage kuko uburyo bwo kubirwanya butabuze. Yasabye abagize umuryango kwirinda makimbirane no kwita by' umwiharuko ku ikemurwa ry'ibi bibazo.
Yashimye ngamba Akarere ka Ngororero gafite mu kwita ku buzima bw'umubyeyi n'ubw'umwana zirimo: kuganuza, imikoranire n'abafatanyabikorwa, igikoni mw'isibo, imirima y'ibikoni, kwimakaza isuku n'izindi.

Iki cyumweru cyahariwe ubuzima bw'umubyeyi n'ubw'umwana kije gikurikira ubukangurambaga bwo kurwaya imirire mibi n'igwingira ku nsanganyamatsiko igira iti: "Ni uwacu nakure neza" bwatangijwe ku mugaragaro n'Umunyamabanga wa Leta muri Minisiteri y'butegetsi bw'iguhugu ushinzwe imibereho myiza y'abaturage Hon. Ingabire Assumpta. Hari kuwa 27/04/2022 kw'irerero ry'abana rya Muhororo mu kagari ka Rugogwe mu murenge wa Muhororo.

Muri iki cyumweru hazatangwa ubutumwa bw'ingenzi bukurikira:

1.kunoza isuku n'isukura mu kurwanya indwara ziterwa n'umwanda nk'inzoka zo mu nda n'izindi z'ibyorezo

2.kurwanya indwara ziterwa n'umwanda hakubiyemo inzoka zo mu nda n'izindi z'ibyorezo

3.kwita ku mirire myiza y'umwana mu minsi 1000 ya mbere y'ubuzima bwe

4.kurwanya imirire mibi no ku gwingira kw'abana

5.kurwanya ingaruka zo kubura vitamini A

6.kwitabira ingo mbonezamikurire

7.gukingiza abana

8.kwipimisha inda ku mugore utwite

9.kuboneza urubyaro

10.kwirinda malariya.

Mu Karere ka Ngororero igwingira ry'abana riri ku gipimo cya 50.5% bituma kaza ku mwanya wa mbere mu gihugu.