Kwibuka ku nshuro ya 27 jenoside yakorewe abatutsi mu cyahoze ari komini Ramba byabereye mu murenge wa Kavumu ku rwibutso rwa jenoside yakorewe abatutsi aharuhukiye inzirakarengane 375.
Uhagarariye imiryango y'abacitse kw'icumu mu cyahoze ari komini Ramba (Kavumu, Kageyo na Sovu) Bwana Budengeri Eulade yavuze ko ijambo rutwitsi ryavuzwe na Mugesera Leon ahitwa mu Birembo no ku Kabaya ko "abatutsi bacishwa inzira  ya Nyabarongo bagasubira aho baturutse" ari ryo ryongereye ubukana bwa jenoside yakorewe abatutsi mu cyahoze ari komini Ramba.
 

Muri uyu murenge wa Kavumu hari abana 15 bajugunywe mu cyobo ari bazima abicanyi babarenzaho itaka.
Mu buhamya bwe Cyilima warokotse jenoside yavuze k'urupfu rw'agashinyaguro aba bana bishwe mu cyahoze ari umurenge wa Bayi: Abicanyi bategetse ba nyina gucukura icyobo cyo kubajugunyamo. abana bahondokeyemo bapfa nyuma y'iminsi 3. Harimo abahetswe n'ibitambambuga.
 Bwana Cyilima yasabye ko aho aba bana biciwe hashyirwa ikimenyetso kikandikwaho amazina yabo.
 

Yavuze ko abacitse kw'icumu banze guheranwa n'agahinda ubu bakaba bageze kure biyubaka; asaba ko amazu bubakiwe  ashaje yasanwa.
 Perezida wa Ibuka yashimiye ubuyobozi bw'Akarere uburyo bukomeza gufata mu mugongo abarokotse jenoside, asaba ko imiryango yazimye burundu yajya yibukwa by'umwihariko.
 

Umuyobozi w'Akarere Bwana Ndayambaje Godefroid yagarutse ku mateka ashaririye ya jenoside yakorewe abatutsi n'uruhare ubuyobozi bubi bwayagizemo.
 Yashimiye intambwe abarokotse jenoside bamaze gutera biyubaka n'uruhare rwabo mu kubaka ubumwe bw'abanyarwanda.  Yavuze ko ubuyobozi bw'Akarere butazahwema guharanira icyarushaho gutuma imibereho yabo ikomeza kuba myiza kurushaho.
 Yashimiye abarinzi b'igihango bashoboye kugira abo barokora mu gihe abayobozi bo barimo batiza umurindi abicanyi.  Yashimiye ingabo zahagaritse jenoside zikabohora u Rwanda.
 Yijeje ubufatanye kugirango aho bariya bana 15  bajugunywe hajazashirwe ikimenyetso kizatuma amateka yabo atibagirana.
 

Habayeho kunamira inzirakarengane ziruhukiye ku rwibutso rwa Kavumu hashyirwaho indabyo.
 Umuhango witabiriwe na ba vice mayors bombi, abayobozi b'inzego z'umutekano, abarinzi b'igihango, abakozi b'imirenge ya Kavumu, Kageyo na Sovu.