Kwibuka ku nshuro ya 31 Jenoside yakorewe Abatutsi mu 1994 byakomereje ku rwibutso rwa Jenoside yakorewe Abatutsi rwa Kibilira ruherereye mu murenge wa Gatumba aharuhukiye inzirakarengane barenga 24.000.
Habanje kunamira inzirakarengane zaroshywe mu mugezi wa Nyabarongo ku rwibutso rwa Cyome n'abari abakozi b’ibitaro bya Muhororo bishwe muri Jenoside yakorewe Abatutsi mu 1994.

Ni igikorwa cyitabiriwe na Minisitiri w'Ubutegetsi bw'Igihugu Hon. Mugenzi Patrice, Visi Perezida w'Urukiko rw'Ikirenga Hitiyaremye Alphonse, Depite mu Nteko Ishinga Amategeko Hon. Ndangiza Madina, abajyanama mu Nama Njyanama y'Akarere, abayobozi b'Inzego z'Umutekano, ab'amadini n'amatorero, imbaga y'abaturutse imihanda yose baje kunamira ababo bashyinguye mu rwibutso rwa Kibilira, abayobozi n'imbaga y'abaturage b'umurenge wa Gatumba n'iyo bihana imbibi. 

Mu guha ikaze abitabiriye iki gikorwa; umuyobozi w'Akarere Bwana Nkusi Christophe yavuze ku bukana bwa Jenoside yakorewe Abatutsi mu 1994 mu Karere ka Ngororero:
- mu cyahoze ari komini Kibirira hageragerejwe Jenoside mu 1990. Kuva icyo gihe Abatutsi barahizwe, bicwa urw'agashinyaguro.  Ntibigeze bagira amahoro kugeza mu 1994 ubwo Inkotanyi zibohoye u Rwanda.
- Musenyeri Gasore wakiraga abamuhungiyeho yishwe urw'agashinyaguro.
- Akarere ka Ngororero kabarurwamo inzibutso 7 bigaragaza ko Jenoside yatwaye inzirakarengane zitabarika.
Ku rwibutso rwa Kibirira honyine hashyinguye inzirakarengane barenga 25,000.

Ndutiye  Alphonse yatanze ikiganiro ku mateka ya Jenoside yakorewe Abatutsi mu 1994. Yavuze ko ku ngoma y'Umwami abanyarwanda bari bunze ubumwe butajegajega, ko batangiye gucikamo ibice mu gihe cy'abakoloni. Amacakubiri yakomeje kuri Leta ya mbere n'iya 2 kugeza kuri Jenoside yakorewe Abatutsi mu 1994.
Yavuze uburyo ingabo zahagaritse Jenoside zikarokora abahigwaga, ubu abanyarwanda bakaba barunze ubumwe u Rwanda rukaba ruhumeka ituze, amahoro n'amajyambere. 
Yavuze ko Genocide ikomeje mu Karere u Rwanda ruherereyemo kandi igihugu cy'Ububiligi cyakolonije u Rwanda kikabitiza umurindi.

Bankunzekera Christine yarokotse Jenoside yakorewe Abatutsi. Mu buhamya burebure 
nawe yavuze ko Jenoside yatangiye kera mu cyahoze ari komini Kibilira Abatutsi bicwa urusorongo, abize baribasirwa kandi bakicwa n'abaturanyi babo.
Yavuze uburyo yahungiye kuri mwalimu we akamwihakana;
imodoka ya Burugumesitiri niyo yatwaye lisansi yo gutwika inzu ya IGA Abatutsi bari bahungiyemo.
Yashimiye abihaye Imana babahishe barimo Musenyeri Gasore nawe waje kwicwa.
Yashimiye ingabo zabarokoye zikabasubuza ubuzima. Yanashimiye ubuyobozi bwiza bw'Igihugu bwatumye batera intmbwe ikomeye mu kwiyubaka ubu bakaba batanga umusanzu ugaragara mu kubaka u Rwanda.
Perezida wa Ibuka Bwana Ntagisanimana Jean Claude yashimiye Politiki zitandukanye zituma abarokotse Jenoside yakorewe Abatutsi babayeho neza: babona uburezi, ubuvuzi, amacumbi, n'izindi gahunda ubuyobozi bwiza bw'Igihugu cyacu bubagezaho.
Yashimiye ubuyobozi bw'Akarere burimo kwandika igitabo ku mateka ya Jenoside yakorewe Abatutsi mu Karere ka Ngororero. 
Yagarutse ku bibazo bikiriho: inzibutso zitaratunganywa bijyanye n'igihe, amacumbi ashaje, ingengabitekerezo ya Jenoside ikigaragara mu Karere, imibiri itaraboneka ngo ishyingurwe mu cyubahiro.

Umushyitsi mukuru muri iki gikorwa yari Minisitiri  w'Ubutegetsi bw'Igihugu. Yakomeje kandi  ahumuriza abarokotse ati "muhumure Jenoside ntizongera ukundi. Turi mu biganza byiza by'ubuyobozi birangajwe imbere na Nyakubahwa Perezida wa Repubulika Paul Kagame washyize umuturage ku isonga. 

Yasabye abitabiriye iki gikorwa guca ukubiri n'ingengabitekerezo ya Jenoside bakamaganira kure abapfobya Jenoside yakorewe Abatutsi.  Yashishikaraje ababa bazi aho imibiri itaraboneka iherereye kugira umutima wa kimuntu bakaherekana igashyingurwa mu cyubahiro. 
Yashimiye ingabo zahoze ari iza RPA zahagaritse Jenoside ubu abanyarwanda bakaba babayeho neza.
Yasabye buri wese by'umwihariko urubyiruko gukoresha ikoranabuhanga bagahashya abakigambiriye kubiba amacakubiri, bagakomera ku bumwe bwacu kuko nizo mbaraga zacu. 
Igikorwa cyaranzwe kandi no gushyingura mu cyubahiro umubiri wabonetse no kunamira inzirakarengane ziruhukiye mu rwibutso rwa Jenoside yakorewe Abatutsi rwa Kibilira hashyirwa indabo kuri uru rwibutso.