Ibibazo bibangamiye imibereho myiza y'abaturage bihangayikishije abafatanyabikorwa b'Akarere ka Ngororero n'abayobozi bako. Ibi byatumye bakora umwiherero w'iminsi 3 mu karere ka Musanze muri Best View Hotel bashakira hamwe uburyo byavugutirwa umuti. Kuri President wa JADF Padiri Jean Paul Rutakisha ngo "ni umwanya wo kwisuzuma harebwa ahari imbaraga cyangwa intege nke mu guteza imbere Akarere ka Ngororero hibandwa ku gukemura ibibazo bibangamiye imibereho myiza y'abaturage."

Umuyobozi  w'Ikigo cy'Igihugu gishinzwe imyoborere (RGB) Dr Usta KAITESI niwe watangije uyu mwiherero.

CEO wa RGB Madame Usta Kayitesi asobanura CRC y'Akarere ka Ngororero

Dr Kayitesi yashimiye ubufatanye bwimbitse buri hagati y'ubuyobozi bw'Akarere ka Ngororero na JADF Isangano agira ati:"ubumwe bwacu nizo mbaraga zacu" Ati uku guhura mukicarana mukaganira ku cyateza imbere abo mushinzwe bibaha imbaraga zo gufata icyerekezo gihamye nta gutatanya imbaraga, mukavuga rumwe ku mibereho myiza y'abagenerwabiokrwa bacu. Ati mube Isangano ry'umuturage koko.
Yerekanye icyegeranyo cy'uko abaturage babona imiyoborere n'imitangire ya serivisi mu Karere ka Ngororero (Citizen Report Card 2022) mu byiciro 16 byatoranijwe.  Yagaragaje ko Akarere ka Ngororero kazamutse neza mu byiciro 14 kuri 16, kava ku mwanya wa 24 kagera ku mwanya  wa 10 ku rwego rw'Igihugu naho ku rwego rw'intara kavuye ku mwanya wa 6 kajya ku mwanya wa 3. Yanagaragaje ahakiri intege nke nko mu cyiciro cy'ubuhinzi, imihanda n'isuku asaba ubuyobozi bw'Akarere n'abafatanyabikorwa kubyitaho by'umwihariko bityo abaturage bakanyurwa.
Abitabiriye ubwihererero bunguranye ibitekerezo kuri kiriya cyegeranyo giherutse gutangazwa na RGB kigaragaza uko abaturage babona imitangire ya serivisi mu byiciro 16 butandukanye.
President wa JADF ati isuku tuyihagurukire kurushaho , ubukarabiro bwongere bukoreshwe neza, twongere imbaraga mu bukangurambaga mu nsengero no mu kiliziya. Yagarutse ku buryo abaturage bahabwa serivisi yibutsa ko kwuka umuturage inabi byacika burundu.

Umuyobozi w'Inama Njyanama y'Akarere Madamu Nyiramasengesho Jeannette yagarutse ku cyizere abaturage bafitiye ubuyobozi avuga k'umusanzu w'abajyanama uzatangwa mu cyumweru cyahariwe umujyanama mu gukosora ahagaragajwe  ishusho idashimishije nko mu kiciro cy'isuku. Yongeye ho ko
Komisiyo za Njyanama y'Akarere n'iza JADF Isangano zizarushaho gutahiriza umugozi umwe mu gukosora ahabonetse inenge.

President wa RIC Padiri Ntirandekura Gilbert yavuze ko Citizens Report Card imeze nk'indangamanota igaragaza ahari intege nke n'imbaraga. Yahamagarariye buri wese ku rwego ariho gukosora ahari ibara ry'umutuku.
Umuyobozi w'Akarere Bwana Nkusi Christophe yashimiye RGB ku cyegeranyo yakoze igaragaza ishusho y'Akarere, yishimira intambwe yatewe. Yagarutse ahari intege nke ashimangira ko hagiye gushyirwa imbaraga
 bigakosorwa ku bufatanye bw'Akarere n'abafatanyabikorwa.
CEO wa RGB yashimiye ko muri uyu mwiherero hazabonekamo ibisubizo by'inenge abaturage batanzeho amakuru. Yasabye gukora ku buryo butandukanye n'ubwakoreshejwe mbere ariko ntibutange umusaruro.
Abitabiriye mu mwiherero bakomeje bareba icyageranyo ku ngamba z'iterembere ry'akarere DDS (District Development Strategies) cyatanzwe n'umuyobozi w'ishami ry'Igenamigambi, Ikurikirana n'Isuzuma Bwana Birorimana Jean Paul.

Mu kungurana ibitekerezo kuri iyi DDS abari mu mwiherero bigabanijemo amatsiinda:  itsinda ry'ubukungu ryungurana ibitekerezo ku kurwanya isuri, kuzamura umusaruro w'ubuhinzi, kurwanya imirire mibi n'igwingira; itsinda ry' imibereho myiza y'abaturage ryaganiriye ku kurwanya ubukene, igwingira, isuku nkeya n'ibindi bibazo bibangamiye imibereho myiza y'abaturage naho itsinda ry'imiyoborere myiza ryibanze  ku mitangire ya serivisi, icyegeranyo cya RGB (CRC 2022),  guhindura imyumvire no ku makimbirane mu miryango.
Muri uyu mwiherero hatanzwe ikiganiro ku igenanigambi cyatanzwe n'intumwa z'umufatanyabikorwa ADEPR ubinyujije mu mushinga Compassion International.

Hanabayeho kugaragaza ibyakozwe n'Abafatanyabikorwa b'Akarere mu mwaka w'ingengo y'imari wa 2022-2023 n'ibiteganyijwe muri 2023-2024, kwiyemeza kw'abafatanyabikorwa mu gufasha mu gukemura ibibazo bibangamiye imibereho myiza y'abaturage (Human Security Issues). Umuyobozi wa JADF Isangano Padiri Rutakisha Jean Paul yagize ati: "ibitekerezo byiza n'imigambi twafashe yo kwita ku mibereho myiza y'Abaturage ntibibe amasigara kicaro ahubwo buri wese abigire intego".  Yanasabye ko hashyirwaho ry'amategeko yihariye agenga JADF-ISANGANO.

Ku munsi wa 3 w'umwiherero wa JADF hatanzwe ikiganiro ku mikurire y'umwana cyateguwe n'umukozi w'Akarere ushinzwe uburinganire n'iterambere ry'umuryango. Mu kungurana ibitekerezo hibanzwe ku burenganzira bw'umwana bugomba kubahirizwa kuva yasamwa, by'umwihariko akimara kuvuka, gushyiraho umugoroba w'umwana yisanzuriramo no gushishikariza ababyeyi kumenya no kubahiriza uburenganzira bw'umwana.
Umwiherero washojwe no gushyira ahagaragara imyanzuro yawuvuyemo. Awusoza, umuyobozi w'Inama Njyanama Madame Nyiramasengesho Jeannette yashimiye by'umwihariko ubuyobozi bwa JADF Isangano bwashyize imbaraga mu migendekere myiza y'uyu mwiherero, asaba ko imyanzuro yawuvuyemo yashyirwa mu bikorwa bidatinze kandi hakazabaho umwanya wo kureba ko byubahirijwe.
Yashimiye ipfundo ry'ubufatanye hagati y'Akarere na JADF Isangano yifuza ko ryajya rigaragaza ibikorwa nibura buri gihembwe.

Uyu mwiherero witabiriwe na Komite Nyobozi y'Akarere, Inama Njyanama y'Akarere, abafatanyabikorwa batandukanye, Umuyobozi wa RIC abanyamabanga nshingwabikorwa b'imirenge, abayobozi b'amashami na bamwe mu bakozi b'Akarere. Warangiye Akarere kungutse umufatanyabikorwa mushya Gardens for Health International.