Mu rwego rwo kugaragaza uruhare rwabo mu gushyira umuturage ku isonga Abafatanyabikorwa b'Akarere ka Ngororero bibumbiye muri JADF ISANGANO batangiye imurikabikorwa (open day) rizamara iminsi 3 bagaragaza umusaruro wavuye mu mikorere n'imikoranire yabo n' akarere n'abagenerwabikorwa mu mirenge itandukanye igize Akarere ka Ngororero.  Imurikabikorwa ryafunguwe ku mugaragaro na Guverineri w'Intara y'Iburengerazuba Hon Ntibitura Jean Bosco ari kumwe n'Umuyobozi w'Akarere @cnkusi20 n'abandi bagize Komite Nyobozi y'Akarere, Umuyobozi w'Inama Njyanama y'Akarere Madamu Nyiramasengesho Jeannette, abayobozi b'Inzego z'Umutekano zikorera mu Karere, Abanyamabanga Nshingwabikorwa b'Imirenge, abayobozi n'abaturage b'umurenge wa Ngororero n'iyo bihana imbibi.
Guverineri w'Intara y'Iburengerazuba yavuze ko urugendo rw'iterambere JADF Isangano barimo ubuyobozi bw'Intara bari kumwe nabo.
Guverineri Ntibitura: "uru rugendo murimo turi kumwe. Gutera imbere birashoboka buri wese agize umuco w'ubunyangamugayo agaharanira kugira icyo akora kimuteza imbere. Akarere ka Ngororero gafite amahirwe menshi agomba kubyazwa umusaruro. 
Tugomba kwirinda gutegereza ak' imuhana kaza imvura ihise ahubwo tugakora kuko turashoboye."
Guverineri yasabye JADF Isangano gukomeza gushyira imbaraga muri ibi bikurikira:
Gushyira imbaraga muri gahunda yo kwivana mu bukene (Graduation);
Guhanga imirimo mishya by'umwihariko mu rubyiruko n'abagore;
Kurwanya imirire mibi n'igwingira  mu bana bato;
Gukemura ibibazo bibangamiye imibereho myiza y'abaturage;
Guhindura imyumvire (mindset change and capacity development );
kwita ku bikorwa remezo birimo amazi, amashanyarazi n'imihanda.
Imurikabikorwa ryitabiriwe n'abafatanyabikorwa 48 biganjemo abita ku buhinzi n'ubworozi bubumbatiye abaturage benshi mu Karere ka Ngororero.
Ingengo y'imari ya JADF ISANGANO irakabakaba miliyari 11 z'amafaranga y'u Rwanda.