Ibirori byo kwizihiza ku nshuro ya 31 Umunsi Mukuru wo Kwibohora byabereye mu midugudu yose igize Akarere ka Ngororero.
Abaturage baganiriye ku icyo Kwibohora bivuze ku Banyarwanda, barebeye hamwe ibyagezweho "twibohora" mu byiciro bitandukanye mu iterambere, bunguranye ibitekerezo ku gusigasira ibyagezweho "abanyarwanda twiyushye akuya duharanira iterambere rirambye mu kunoza imibereho yacu n'iy'abatugana no kurushaho gutera Intambwe mu Ntengo.
Mu Mudugudu wa Nyenyeril mu kagari ka Mugano mu murenge wa Ngororero ibirori byabimburiwe no gutaha amazu yubakiwe abatishoboye no kubaremera .
Igikorwa cyayobowe n'Umuyobozi w'Akarere Bwana Nkusi Christophe ari kumwe n'abayobozi b'inzego z'umutekano n'Umunyamabanga Nshingwabikorwa w'Umurenge wa Ngororero.
Uwizeye Julienne wubakiwe inzu yagize ati nageze mu bindi bihugu ndi gushaka imibereho  ariko sinigeze mbona ubuyobozi bwiza nk'ubw'u Rwanda buhoza umuturage ku isonga." Mugenzi we Rusigariye wo mu Mudugudu wa Rukaragata mu kagari ka Rususa we ati:
"Iyo kwibohora bitabaho simba ntuye mu nzu nziza iteye itya."
Mayor Nkusi yabasabye gufata amazu neza agira ati "umwana uzi ubwenge bamusiga yinogereza."
Yongeyeho ati "kubera imiyoborere myiza ya Nyakubahwa Perezida wa Repubulika Paul Kagame mutuye heza  heza kandi neza."
Mu Mudugudu wa Kabagari ibirori byzihirijwe kuri stade y'Akarere.  Byabimburiwe n'umupira w'amaguru wahuje ikipe y'abakozi Morning Star n'iya Youth Volunteers The Golden.
Umupira watangijwe n'Umuyobozi w'Akarere Bwana Nkusi Christophe aei kumwe n'Umuyobozi w'Ingabo n'uwa Police. Umupira warangiye amakipe yombi aguye miswi 1-1.
Umuyobozi w'Ingabo Major Ndagijimana Simon mu kiganiro yatanze yasobanuriye abaturage ko kwibohora biri kwinshi: mu isuku, mu buhinzi n'ubworozi, mu mufuka no mu myumvire. Yabasabye kubahiriza gahunda za Leta bakibohora batera Intambwe mu Ntego.
Ageza ijambo ku mbaga y'abaturage bakereye kwizihiza uyu munsi, Umuyobozi w'Akarere Bwana NKUSI Christophe yabahamagariye gukomeza Intambwe mu Ntego  bakora cyane bakivana mu bukene (graduation).
Yabibukije ko Kwibohora nyako ari ukwigobotora ubujiji n'ubukene mu rugamba rw'iterambere ry'imibereho myiza.
Mayor Nkusi: " Urugamba rwo Kwibohora turukomeze duharanira kwishyura ubwisungane mu kwivuza ku gihe, dukomeza kwizigamira muri Ejo Heza, dukomeza kugarura abana mu ishuli ku barivuyemo, twimakaza isuku n'isukura biturinda indwara ziterwa n'umwanda, dukomeza kurwanya imirire mibi n'igwingira mu ngo zacu."
Ibirori byaranzwe n'imbyino, imivugo n'indirimbo z'abahanzi batandukanye byarataga ubutwari bw'Ingabo zabohoye u Rwanda rukaba rukataje mu iterambere mu ruhando rw'amahanga.