Kuri uyu wa 2 tariki ya 17/07/2024 mu tugari twose habaye inteko z'abaturage zabahuje n'abayobozi babo bungurana ibitekerezo kuri gahunda za Leta: umutekano, kwishyura ubwisungane mu kwivuza, kwizigamira muri Ejo Heza, isuku n'isukura, kurwanya imirire mibi, kwirinda no gukumira icyorezo cy'indwara y'bushita bw'inkende Mpox,....
Umuyobozi w'Akarere wungirije ushinzwe imibereho myiza y'abaturage Mukunduhirwe Benjamine yifatanije n'abaturage b'utugari twa Rususa na Kazabe tw'umurenge wa Ngororero  bateraniye kuri Ngororero stadium. Nyuma y'inteko habaye igikorwa cyo gushyikiriza igihembo umurenge wa Ngororero wahize iyindi mu Karere mu bikorwa by'isuku n'isukura. 

Uyu murenge wahawe ikinyabiziga cya moto yatanzwe na Police y'Igihugu. Uru rwego  rwiifatanije n'abaturage mu bikorwa byo kwimakaza isuku n'isukura no kurwanya imirire mibi n'igwingira  mu kwezi kwahariwe ibikorwa bya Police y'Igihugu. 
Akagari ka Rususa ko muri uyu  murenge  niko kabaye aka mbere mu tugari 73 tugiza Akarere ka Ngororero; gahembwa frws 1,000,000.
Intero yabo iragira iti: "Ngororero ikeye, itekanye izira imirire mibi n'igwingira."

Kugirango uyu murenge wegukane iki gihembo habayeho isuzumabikorwa: Hari kuwa 17/05/2024 (12h20' -16h30') ubwo imirenge ya Hindiro na Ngororero yasurwaga n'Itsinda ryaturutse ku rwego rw'Igihugu riyobowe na SSP JMV NDUSHABANDI, bari baherekejwe n'itsinda ryaturutse ku rwego rw'Intara y'Iburengerazuba bayobowe na SP Solange NYIRANEZA Umuyobozi wa Police wungirije mu Ntara ushinzwe Community Policing. Bari baje gusuzuma uko amarushanwa y'isuku, kurwanya igwingira, kubungabunga umutekano yagenze. 

Bakiriwe na Madamu Benjamine MUKUNDUHIRWE, Umuyobozi w'Akarere wungirije ushinzwe Imibereho myiza y'abaturage, wari kumwe na Lt Col Edouard NKURANYABAHIZI Umuyobozi w'Inkeragutabara mu Karere.
 Mu Murenge wa Hindiro wari uhagarariwe na Madamu Benihirwe Epiphanie umukozi ushinzwe ubuzima, isuku n'isukura  basuye Akagari ka RUNYINYA n'Akagari ka GATARE nyuma bakomereza mu Murenge wa Ngororero aho bakiriwe n'itsinda  ry'abayobozi bo ku murenge n'abo mu tugari bayobowe na Bwana Daniel MUGISHA Umunyamabamga Nshingwabikorwa w'Umurenge, na Bwana MANIRAGABA Laurent Umuyobozi w'Inama Njyanama y'Umurenge. Hari kandi abafatanyabikorwa b'umurenge wa Ngororero.

Ibyakozwe icyo gihe:

Hasuwe utugari 2:

1. Rususa

Muri aka Kagari hasuwe;
1. Inzu y'aho abagenzi bafatira ikawa (coffee shop) mu gihe bategereje imodoka
2. Ubwiherero rusange bw'isoko rya Ngororero,
3. Irerero ryo kwa NTEZIRIZAZA Wellars Umudugudu wa Kabagari, abayobozi baganira n'abana baharererwa,
4. Gusura ingo z'abaturage 2 aribo MPAYIMANA Gratien, na MUNYANKINDI Faustin.

2. Kazabe
Muri aka Kagari hasuwe HBECD. Mu gutanga amanota umurenge wa Ngororero wegukanye umwanaya wa mbere, akagari ka Rususa (nanone k'uyu murenge) gahiga utundi tugari.